meri shikast ka bais ye iftiKhaar bhi tha

mirī shikast kā baa.is ye iftiḳhār bhī thā

jo thā harīf vahī apnā rāzdār bhī thā

ye aur baat tavajjoh na tum ne dī varna

tumhāre chāhne vāloñ meñ ḳhāksār bhī thā

mile the mujh se ba-zāhir baḌe tapāk se log

tabī.atoñ meñ ba-bātin magar ġhubār bhī thā

ga.e the tum bhī to us but ke ḳhair-maqdam meñ

magar tumhārā kisī mad meñ kuchh shumār bhī thā

tamām umr asīroñ kī tarah jiite rahe

hamāre gird yaqīnan koī hisār bhī thā

samā.atoñ ke tajassus se ye huā mahsūs

hamārī tūl-kalāmī meñ iḳhtisār bhī thā

hayāt ke sabhī shoboñ meñ dastaras thī use

baḌā zahīn thā daanā thā burdbār bhī thā

isī liye use sauñpā gayā thā kār-e-jahāñ

kisī ko us pe bharosā thā e.atibār bhī thī

tire sukūt pe dil kī ajab thī kaifiyyat

vo pur-sukūn bhī thā aur be-qarār bhī thā

baḌe farishta-sifat the tumhāre shahr ke log

diloñ meñ dard mizājoñ meñ inkisār bhī thā

ḳhush aa ga.ī hai ai rahbar supurdagī varna

kamīn-gāheñ bhī thiiñ jāda-e-farār bhī thā

meri shikast ka bais ye iftiKHar bhi tha

jo tha harif wahi apna raazdar bhi tha

ye aur baat tawajjoh na tum ne di warna

tumhaare chahne walon mein KHaksar bhi tha

mile the mujh se ba-zahir baDe tapak se log

tabiaton mein ba-baatin magar ghubar bhi tha

gae the tum bhi to us but ke KHair-maqdam mein

magar tumhaara kisi mad mein kuchh shumar bhi tha

tamam umr asiron ki tarah jite rahe

hamare gird yaqinan koi hisar bhi tha

samaaton ke tajassus se ye hua mahsus

hamari tul-kalami mein iKHtisar bhi tha

hayat ke sabhi shobon mein dastaras thi use

baDa zahin tha dana tha burdbar bhi tha

isi liye use saunpa gaya tha kar-e-jahan

kisi ko us pe bharosa tha eatibar bhi thi

tere sukut pe dil ki ajab thi kaifiyyat

wo pur-sukun bhi tha aur be-qarar bhi tha

baDe farishta-sifat the tumhaare shahr ke log

dilon mein dard mizajon mein inkisar bhi tha

KHush aa gai hai ai rahbar supurdagi warna

kamin-gahen bhi thin jada-e-farar bhi tha