meri thakan mere qasd-e-safar se zahir hai

mirī thakan mire qasd-e-safar se zāhir hai

udaas shaam kā manzar sahar se zāhir hai

na koī shāḳh-e-ibārat na koī lafz kā phuul

ye ahd bāñjh hai qaht-e-hunar se zāhir hai

jo pūchhā kyā huiiñ shāḳheñ samar-ba-dast jo thiiñ

kahā ki dekh lo sab kuchh shajar se zāhir hai

faqat ye vahshat-e-iz.hār hai ilaaj nahīñ

ye bojh yuuñ nahīñ utregā sar se zāhir hai

maiñ apnī raakh meñ ḳhvāhish dabā.e baiThā huuñ

ye aag jal ke rahegī sharar se zāhir hai

vo umr-bhar kī asīrī milī tamannā ko

ġharīb mar ke hī niklegī ghar se zāhir hai

tū reza reza ta.alluq se ghar banā 'shāhid'

magar ye dasht to dīvār-o-dar se zāhir hai

meri thakan mere qasd-e-safar se zahir hai

udas sham ka manzar sahar se zahir hai

na koi shaKH-e-ibarat na koi lafz ka phul

ye ahd banjh hai qaht-e-hunar se zahir hai

jo puchha kya huin shaKHen samar-ba-dast jo thin

kaha ki dekh lo sab kuchh shajar se zahir hai

faqat ye wahshat-e-izhaar hai ilaj nahin

ye bojh yun nahin utrega sar se zahir hai

main apni rakh mein KHwahish dabae baiTha hun

ye aag jal ke rahegi sharar se zahir hai

wo umr-bhar ki asiri mili tamanna ko

gharib mar ke hi niklegi ghar se zahir hai

tu reza reza talluq se ghar bana 'shahid'

magar ye dasht to diwar-o-dar se zahir hai