meri umr-e-rawan hai aur main hun

mirī umr-e-ravāñ hai aur maiñ huuñ

ye jins-e-rā.egāñ hai aur maiñ huuñ

ġham-e-gum-gashtagāñ hai aur maiñ huuñ

ye dard-e-jāvedāñ hai aur maiñ huuñ

kahāñ ho kārvāñ vaalo kahāñ ho

talāsh-e-kārvāñ hai aur maiñ huuñ

tasavvur meñ bahāreñ haiñ gul-afshāñ

nigāhoñ meñ ḳhizāñ hai aur maiñ huuñ

zarā āvāz de ai daur-e-māzī

tirā dard-e-nihāñ hai aur maiñ huuñ

faqat merī ḳhamoshī hai ġhazal-ḳhvāñ

sukūt-e-bekarāñ hai aur maiñ huuñ

chaman vaalo ḳhabar bhī hai tumheñ kuchh

ki yād-e-āshiyāñ hai aur maiñ huuñ

mirī taqdīr kāñTe chun rahī hai

bahār-e-bostāñ hai aur maiñ huuñ

mire naġhmāt par ḳhush hone vaale

mirā soz-e-nihāñ hai aur maiñ huuñ

tarastī haiñ ḳharīdāroñ ko nazreñ

lab-e-gauhar-fashāñ hai aur maiñ huuñ

maiñ apne aap ko gum kar chukā huuñ

ye ehsās-e-ziyāñ hai aur maiñ huuñ

qarīb-e-gulisitāñ phirtā huuñ lekin

talāsh-e-gulsitāñ hai aur maiñ huuñ

mire ash.ār kī rūdād 'āzād'

mirā ḳhūn-e-ravāñ hai aur maiñ huuñ

meri umr-e-rawan hai aur main hun

ye jins-e-raegan hai aur main hun

gham-e-gum-gashtagan hai aur main hun

ye dard-e-jawedan hai aur main hun

kahan ho karwan walo kahan ho

talash-e-karwan hai aur main hun

tasawwur mein bahaaren hain gul-afshan

nigahon mein KHizan hai aur main hun

zara aawaz de ai daur-e-mazi

tera dard-e-nihan hai aur main hun

faqat meri KHamoshi hai ghazal-KHwan

sukut-e-bekaran hai aur main hun

chaman walo KHabar bhi hai tumhein kuchh

ki yaad-e-ashiyan hai aur main hun

meri taqdir kanTe chun rahi hai

bahaar-e-bostan hai aur main hun

mere naghmat par KHush hone wale

mera soz-e-nihan hai aur main hun

tarasti hain KHaridaron ko nazren

lab-e-gauhar-fashan hai aur main hun

main apne aap ko gum kar chuka hun

ye ehsas-e-ziyan hai aur main hun

qarib-e-gulisitan phirta hun lekin

talash-e-gulsitan hai aur main hun

mere ashaar ki rudad 'azad'

mera KHun-e-rawan hai aur main hun