meri wafaon ka mujhe wo yun hisab de gaya

mirī vafāoñ kā mujhe vo yuuñ hisāb de gayā

mire samundaroñ ko chhīn kar sarāb de gayā

tujhe ḳhabar hai terā baap kitnā bevaqūf thā

ki jhurriyāñ ḳharīd kar tujhe shabāb de gayā

anā-parast maiñ bhī thā magar ye ishq hī to thā

ki tujh ko ḳhaar ke bajā.e maiñ gulāb de gayā

visāl aur kamāl kā ye silsila rukā huā

vo nār-e-intizār kā mujhe azaab de gayā

kitāb-e-zīst ke sunahre baab ko miTā diyā

mujhe tavīl hijratoñ kā ik nisāb de gayā

maiñ ishq kī zabān meñ kahūñ to kyā kahūñ use

mirā sukūn chhīn kar jo iztirāb de gayā

tirā ilaaj 'kāshif' ab sivā.e sabr kuchh nahīñ

mire pate pe andalīb ye javāb de gayā

meri wafaon ka mujhe wo yun hisab de gaya

mere samundaron ko chhin kar sarab de gaya

tujhe KHabar hai tera bap kitna bewaquf tha

ki jhurriyan KHarid kar tujhe shabab de gaya

ana-parast main bhi tha magar ye ishq hi to tha

ki tujh ko KHar ke bajae main gulab de gaya

visal aur kamal ka ye silsila ruka hua

wo nar-e-intizar ka mujhe azab de gaya

kitab-e-zist ke sunahre bab ko miTa diya

mujhe tawil hijraton ka ek nisab de gaya

main ishq ki zaban mein kahun to kya kahun use

mera sukun chhin kar jo iztirab de gaya

tera ilaj 'kashif' ab siwae sabr kuchh nahin

mere pate pe andalib ye jawab de gaya