meri zindagi ka ye haal tha yahi shakl-e-rah-rawi rahi

mirī zindagī kā ye haal thā yahī shakl-e-rāh-ravī rahī

ki na ġham kā ġham hī rahā kabhī na ḳhushī kī mujh ko ḳhushī rahī

na vo parda-dār hai raaz meñ na kisī kī parda-dārī rahī

jo paḌe the parde sab uTh ga.e magar ab bhī jalvagarī rahī

shab-e-hijr guzrī hai kis tarah tumheñ kyā sunā.ūñ ye mājrā

maiñ ajal ke saa.e meñ thā khaḌā mirī sar pe maut khaḌī rahī

tirī yaad meñ bahut hīla-jū yūñhī guzre shām-o-sahar mire

kabhī din meñ aah se kaam thā kabhī shab meñ nauhagarī rahī

na kisī ke dushman-e-jāñ hue na kisī ko dushman-e-jāñ kiyā

yahī baat thī ki jo ġhair se bhī hamesha apnī banī rahī

mirī hasrateñ mire hausle sab hī jal ke ḳhaak meñ mil ga.e

ye kisī kī dī huī aag thī jo lagī to dil meñ lagī rahī

vo ghaTā kā zor kahāñ gayā shab-e-māh kyā huī sāqiyā

ki na lutf-e-bazm-e-surūr hai na bahār-e-bāda-kashī rahī

ye navāzisheñ tirī bāġhbāñ ki kahīñ kā maiñ nahīñ rah gayā

na vo ranj-e-daur-e-ḳhizāñ rahā na vo fasl-e-gul kī ḳhushī rahī

mirī be-kasī se jahān meñ na huā bhī kuchh to bahut huā

vahī bebasī to rahī magar tirī yaad dil meñ basī rahī

ye savāl kyuuñ ye ḳhayāl kyā hai vafā to is kā ma.aal kyā

yahī zikr vird-e-zabāñ rahā yahī fikr dil ko lagī rahī

na mujhī ko apnā pata milā na tujhī ko DhūñDh ke pā sakā

na mirī ḳhabar na tirī ḳhabar 'ajīb ek be-ḳhabarī rahī

ye maqām-e-shukr hai be-gumāñ rahā ḳhush hī 'ḳhushtar'-e-ḳhush-bayāñ

na 'atā vujūd meñ thī kasar na karam kī us ke kamī rahī

meri zindagi ka ye haal tha yahi shakl-e-rah-rawi rahi

ki na gham ka gham hi raha kabhi na KHushi ki mujh ko KHushi rahi

na wo parda-dar hai raaz mein na kisi ki parda-dari rahi

jo paDe the parde sab uTh gae magar ab bhi jalwagari rahi

shab-e-hijr guzri hai kis tarah tumhein kya sunaun ye majra

main ajal ke sae mein tha khaDa meri sar pe maut khaDi rahi

teri yaad mein bahut hila-ju yunhi guzre sham-o-sahar mere

kabhi din mein aah se kaam tha kabhi shab mein nauhagari rahi

na kisi ke dushman-e-jaan hue na kisi ko dushman-e-jaan kiya

yahi baat thi ki jo ghair se bhi hamesha apni bani rahi

meri hasraten mere hausle sab hi jal ke KHak mein mil gae

ye kisi ki di hui aag thi jo lagi to dil mein lagi rahi

wo ghaTa ka zor kahan gaya shab-e-mah kya hui saqiya

ki na lutf-e-bazm-e-surur hai na bahaar-e-baada-kashi rahi

ye nawazishen teri baghban ki kahin ka main nahin rah gaya

na wo ranj-e-daur-e-KHizan raha na wo fasl-e-gul ki KHushi rahi

meri be-kasi se jahan mein na hua bhi kuchh to bahut hua

wahi bebasi to rahi magar teri yaad dil mein basi rahi

ye sawal kyun ye KHayal kya hai wafa to is ka maal kya

yahi zikr wird-e-zaban raha yahi fikr dil ko lagi rahi

na mujhi ko apna pata mila na tujhi ko DhunDh ke pa saka

na meri KHabar na teri KHabar 'ajib ek be-KHabari rahi

ye maqam-e-shukr hai be-guman raha KHush hi 'KHushtar'-e-KHush-bayan

na 'ata wujud mein thi kasar na karam ki us ke kami rahi