bazar-e-husn-o-shauq mein kamtar nahin hun main

bāzār-e-husn-o-shauq meñ kamtar nahīñ huuñ maiñ

chhū kar mujhe bhī dekh ki ḳhanjar nahīñ huuñ maiñ

jis mai-kade meñ jaam uchhāle nahīñ ga.e

us mai-kade meñ hone se behtar nahīñ huuñ maiñ

bāñdhī ga.ī hai pair meñ zanjīr kis liye

maiñ to huuñ ik ḳhayāl ki paikar nahīñ huuñ maiñ

taaza rahūñgā qalb-o-ḳhirad meñ har ek vaqt

jis ko bulā sakoge vo manzar nahīñ huuñ maiñ

ab bhī haiñ kuchh naqāb haTāne haiñ jo mujhe

dār-o-rasan ke qad ke barābar nahīñ huuñ maiñ

ghabrā ga.e ho dekh ke vus.at mirī ki maiñ

bas ek aabjū huuñ samundar nahīñ huuñ maiñ

dekho mujhe ki mujh meñ haiñ raushan jahāñ ke raaz

raste meñ jo paḌā hai vo patthar nahīñ huuñ maiñ

haiñ intizār meñ sabhī 'rāsiḳh' yahāñ pe kyoñ

niklegā kaise chāñd jo chhat par nahīñ huuñ maiñ

bazar-e-husn-o-shauq mein kamtar nahin hun main

chhu kar mujhe bhi dekh ki KHanjar nahin hun main

jis mai-kade mein jam uchhaale nahin gae

us mai-kade mein hone se behtar nahin hun main

bandhi gai hai pair mein zanjir kis liye

main to hun ek KHayal ki paikar nahin hun main

taza rahunga qalb-o-KHirad mein har ek waqt

jis ko bula sakoge wo manzar nahin hun main

ab bhi hain kuchh naqab haTane hain jo mujhe

dar-o-rasan ke qad ke barabar nahin hun main

ghabra gae ho dekh ke wusat meri ki main

bas ek aabju hun samundar nahin hun main

dekho mujhe ki mujh mein hain raushan jahan ke raaz

raste mein jo paDa hai wo patthar nahin hun main

hain intizar mein sabhi 'rasiKH' yahan pe kyon

niklega kaise chand jo chhat par nahin hun main