miT gae hum muddaa-e-ishq hasil ho gaya

miT ga.e ham mudda.ā-e-ishq hāsil ho gayā

ye fasāna apnī be-rabtī se kāmil ho gayā

un kā barbād-e-karam kahne ke qābil ho gayā

dil haqīqat meñ jahāñ TuuTā vahīñ dil ho gayā

nā-mukammal zindagī ke kuchh mukammal hādsāt

jab murattab ho ga.e afsāna-e-dil ho gayā

maiñ ne jo parda uThāyā tum ko dekhā sāmne

tum ne jis dil par nazar Daalī mirā dil ho gayā

bārhā dekhā hai dil ne o mire mahshar-ḳhirām

hashr uTThā aur tire qadmoñ meñ shāmil ho gayā

dil jahāñ uchhlā nazar aaya muhīt-e-do-jahāñ

arsa-e-kaunain jab simTā mirā dil ho gayā

jab nigāh-e-shauq uTThī husn ban kar rah ga.ī

jo qadam ham ne uThāyā naqsh-e-manzil ho gayā

jaan denā aa gayā un kī tamanna meñ jise

istilāh-e-ishq meñ jiine ke qābil ho gayā

be-ḳhabar rahnā hī achchhā is jahān-e-ġhair meñ

miT gayā jo vāqif-e-ādāb-e-mahfil ho gayā

yā kabhī manzil thī maqsūd-e-mazāq-e-justujū

yā mazāq-e-justujū maqsūd-e-manzil ho gayā

dekhnā 'bāsit' mire ḳhūn-e-tamannā kā faroġh

aur bhī rangīn kuchh dāmān-e-qātil ho gayā

miT gae hum muddaa-e-ishq hasil ho gaya

ye fasana apni be-rabti se kaamil ho gaya

un ka barbaad-e-karam kahne ke qabil ho gaya

dil haqiqat mein jahan TuTa wahin dil ho gaya

na-mukammal zindagi ke kuchh mukammal hadsat

jab murattab ho gae afsana-e-dil ho gaya

main ne jo parda uThaya tum ko dekha samne

tum ne jis dil par nazar Dali mera dil ho gaya

barha dekha hai dil ne o mere mahshar-KHiram

hashr uTTha aur tere qadmon mein shamil ho gaya

dil jahan uchhla nazar aaya muhit-e-do-jahan

arsa-e-kaunain jab simTa mera dil ho gaya

jab nigah-e-shauq uTThi husn ban kar rah gai

jo qadam hum ne uThaya naqsh-e-manzil ho gaya

jaan dena aa gaya un ki tamanna mein jise

istilah-e-ishq mein jine ke qabil ho gaya

be-KHabar rahna hi achchha is jahan-e-ghair mein

miT gaya jo waqif-e-adab-e-mahfil ho gaya

ya kabhi manzil thi maqsud-e-mazaq-e-justuju

ya mazaq-e-justuju maqsud-e-manzil ho gaya

dekhna 'basit' mere KHun-e-tamanna ka farogh

aur bhi rangin kuchh daman-e-qatil ho gaya