miT gaya hota magar zinda hun tadbir ke sath

miT gayā hotā magar zinda huuñ tadbīr ke saath

roz hotā hai tamāsha mirī taqdīr ke saath

kyā zarūrī hai ka.ī ḳhvāb sunahre dekhūñ

'umr kaT jaatī hai ik ḳhvāb kī tā'bīr ke saath

chand ġhazleñ mirī logoñ kī zabāñ par bhī thiiñ

vo mujhe kaise miTātā mirī tahrīr ke saath

vaqt insān ke hālāt badal detā hai

kab talak qaid rahegā koī zanjīr ke saath

chand lamhoñ ke liye roz maiñ jī letā huuñ

jiinā mushkil bhī nahīñ ‘izzat-o-tauqīr ke saath

kyoñ na ho aap kā charchā yahāñ mahfil mahfil

aap chhupte haiñ risāloñ meñ bhī tasvīr ke saath

kāmyābī tirī qismat meñ likhī hai 'sāhil'

do nishāne haiñ tire zehn meñ ik tiir ke saath

miT gaya hota magar zinda hun tadbir ke sath

roz hota hai tamasha meri taqdir ke sath

kya zaruri hai kai KHwab sunahre dekhun

'umr kaT jati hai ek KHwab ki ta'bir ke sath

chand ghazlen meri logon ki zaban par bhi thin

wo mujhe kaise miTata meri tahrir ke sath

waqt insan ke haalat badal deta hai

kab talak qaid rahega koi zanjir ke sath

chand lamhon ke liye roz main ji leta hun

jina mushkil bhi nahin ‘izzat-o-tauqir ke sath

kyon na ho aap ka charcha yahan mahfil mahfil

aap chhupte hain risalon mein bhi taswir ke sath

kaamyabi teri qismat mein likhi hai 'sahil'

do nishane hain tere zehn mein ek tir ke sath