miT gaya sab jo likha tha muntashir auraq par

miT gayā sab jo likhā thā muntashir aurāq par

ḳhvāhisheñ hasrat banīñ to rakh diyā ik taaq par

sāmne aatā nahīñ hai kyoñ kabhī tū be-naqāb

zulm itnā to na kar is dīda-e-mushtāq par

bandagī karnī nahīñ thī ai bashar tujh ko agar

sabt kī thī mohr kyoñ phir bandhan-e-mīsāq par

jo hue ruḳhsat yahāñ se āsmāñ par saj ga.e

DhūñDhtā huuñ ik sitāra sarhad-e-āfāq par

kyoñ kahā ahl-e-ḳhirad ne dard kā darmāñ nahīñ

kab kiyā thā ham ne takiya zahr ke tiryāk par

sho’la-e-ulfat ko nazroñ kā tasādum chāhiye

aag ko jaise ragaḌnā sang kā chaqmāq par

miT gaya sab jo likha tha muntashir auraq par

KHwahishen hasrat banin to rakh diya ek taq par

samne aata nahin hai kyon kabhi tu be-naqab

zulm itna to na kar is dida-e-mushtaq par

bandagi karni nahin thi ai bashar tujh ko agar

sabt ki thi mohr kyon phir bandhan-e-misaq par

jo hue ruKHsat yahan se aasman par saj gae

DhunDhta hun ek sitara sarhad-e-afaq par

kyon kaha ahl-e-KHirad ne dard ka darman nahin

kab kiya tha hum ne takiya zahr ke tiryak par

sho’la-e-ulfat ko nazron ka tasadum chahiye

aag ko jaise ragaDna sang ka chaqmaq par