miTa ke mujhko use ashk-bar hona tha

miTā ke mujh ko use ashk-bār honā thā

ye sāneha bhī ajab mere yaar honā thā

vo haar kar bhī mire dil ko jiit letā magar

use to apnī anā kā shikār honā thā

ajab junūn thā tesha uThā liyā ham ne

ye kaam ishq meñ be-iḳhtiyār honā thā

nadī ne kī thī Dubone kī sāzisheñ kyā kyā

kabhī bhañvar to kabhī tez dhaar honā thā

tamām umr satāyā usī ne ham ko 'majīd'

jise hamāre liye ġham-gusār honā thā

miTa ke mujh ko use ashk-bar hona tha

ye saneha bhi ajab mere yar hona tha

wo haar kar bhi mere dil ko jit leta magar

use to apni ana ka shikar hona tha

ajab junun tha tesha uTha liya hum ne

ye kaam ishq mein be-iKHtiyar hona tha

nadi ne ki thi Dubone ki sazishen kya kya

kabhi bhanwar to kabhi tez dhaar hona tha

tamam umr sataya usi ne hum ko 'majid'

jise hamare liye gham-gusar hona tha