miTane ahl-e-haq ko jhuT ke lashkar nikal aae

miTāne ahl-e-haq ko jhuuT ke lashkar nikal aa.e

ujāloñ ke muqābil raat ke manzar nikal aa.e

hamāre hukmrāñ ko kis ghaḌī insāf kī sūjhī

ki dariyā jab kināre toḌ kar bāhar nikal aa.e

numū kī rut tumhāre shahr meñ sab ke liye kab thī

havā ne chhū liyā jis ko usī ke par nikal aa.e

yahī Dar saf.ha-e-āḳhir pe calendar ke likkhā hai

december sā kahīñ koī na phir manzar nikal aa.e

maiñ ḳhud ko dostoñ ke darmiyāñ mahsūs kartā thā

magar jab shab huī chāroñ taraf ḳhanjar nikal aa.e

lahū bo kar hameñ ummīd thī phūloñ ke khilne kī

magar miTTī se phūloñ kī jagah patthar nikal aa.e

masīhā jin ko samjhā thā mirī sāda-mizājī ne

unhīñ kī āstīñ se dekhiye ḳhanjar nikal aa.e

miTane ahl-e-haq ko jhuT ke lashkar nikal aae

ujalon ke muqabil raat ke manzar nikal aae

hamare hukmran ko kis ghaDi insaf ki sujhi

ki dariya jab kinare toD kar bahar nikal aae

numu ki rut tumhaare shahr mein sab ke liye kab thi

hawa ne chhu liya jis ko usi ke par nikal aae

yahi Dar safha-e-aKHir pe calendar ke likkha hai

december sa kahin koi na phir manzar nikal aae

main KHud ko doston ke darmiyan mahsus karta tha

magar jab shab hui chaaron taraf KHanjar nikal aae

lahu bo kar hamein ummid thi phulon ke khilne ki

magar miTTi se phulon ki jagah patthar nikal aae

masiha jin ko samjha tha meri sada-mizaji ne

unhin ki aastin se dekhiye KHanjar nikal aae