miTTi hun bhigne de mere kuza-gar abhi

miTTī huuñ bhīgne de mire kūza-gar abhī

masrūf gardishoñ meñ hai dast-e-hunar abhī

ḳhud baḌh ke qatl-gāh meñ qātil ke sāmne

maqtūl ho gayā hai bahut bā-asar abhī

chehroñ bharī kitāb meñ miltī nahīñ hai ab

dekhī thī terī shakl kisī saf.ha par abhī

chamke the lafz terī samā.at kī dhuup meñ

husn-e-ḳhayāl thā ki havā mo'atabar abhī

dil ābloñ kā rakhne ko shāyad utar paḌe

abr-e-ravāñ hai dasht meñ mahv-e-safar abhī

ham haiñ charāg-e-āḳhir-e-shab to malāl kyā

bujh bhī ga.e havā se to hogī sahar abhī

miTTi hun bhigne de mere kuza-gar abhi

masruf gardishon mein hai dast-e-hunar abhi

KHud baDh ke qatl-gah mein qatil ke samne

maqtul ho gaya hai bahut ba-asar abhi

chehron bhari kitab mein milti nahin hai ab

dekhi thi teri shakl kisi safha par abhi

chamke the lafz teri samaat ki dhup mein

husn-e-KHayal tha ki hawa mo'atabar abhi

dil aablon ka rakhne ko shayad utar paDe

abr-e-rawan hai dasht mein mahw-e-safar abhi

hum hain charag-e-aKHir-e-shab to malal kya

bujh bhi gae hawa se to hogi sahar abhi