miTTi pe koi naqsh bhi ubhra na rahega

miTTī pe koī naqsh bhī ubhrā na rahegā

gir jā.egī dīvār to saaya na rahegā

aa.egā nazar dhuup meñ chhat par vo khule sar

galiyoñ meñ ye rātoñ kā nikalnā na rahegā

shāḳhoñ se numū pattoñ se chhin jā.egī ḳhushbū

kaT jā.egā jab peḌ to kyā kyā na rahegā

sochūñ to koī lafz milegā na tire naam

likkhūñgā to kāġhaz koī saada na rahegā

bikhre hue chehroñ meñ khaḌā soch rahā huuñ

āñkheñ na raheñgī ki tamāshā na rahegā

miT jā.ūñgā likhte hue rūdād shab-o-roz

jab maiñ na rahūñgā mirā afsāna rahegā

kho jā.egī ḳhāmoshī meñ āvāz-e-jaras bhī

rāhoñ meñ kahīñ naqsh-e-kaf-e-pā na rahegā

aage bhī dikhā.ī nahīñ degī koī manzil

aur ghar ko palaTne kā bhī rasta na rahegā

maiñ harf huuñ likh lo mujhe āvāz huuñ sun lo

aate haiñ vo din jab koī mujh sā na rahegā

miTTi pe koi naqsh bhi ubhra na rahega

gir jaegi diwar to saya na rahega

aaega nazar dhup mein chhat par wo khule sar

galiyon mein ye raaton ka nikalna na rahega

shaKHon se numu patton se chhin jaegi KHushbu

kaT jaega jab peD to kya kya na rahega

sochun to koi lafz milega na tere nam

likkhunga to kaghaz koi sada na rahega

bikhre hue chehron mein khaDa soch raha hun

aankhen na rahengi ki tamasha na rahega

miT jaunga likhte hue rudad shab-o-roz

jab main na rahunga mera afsana rahega

kho jaegi KHamoshi mein aawaz-e-jaras bhi

rahon mein kahin naqsh-e-kaf-e-pa na rahega

aage bhi dikhai nahin degi koi manzil

aur ghar ko palaTne ka bhi rasta na rahega

main harf hun likh lo mujhe aawaz hun sun lo

aate hain wo din jab koi mujh sa na rahega