miTTi se jo juDe the wo jazbaat le liye

miTTī se jo juḌe the vo jazbāt le liye

hijrat ne khet aur mire bāġhāt le liye

paḌh kar darūd ghar se safar ko maiñ chal paḌā

nām-e-nabī ne raah ke ḳhadshāt le liye

maiñ ik hunar ke shahr kā farzand-e-ḳhās thā

ġhurbat ne mere saare kamālāt le liye

sharm-o-hayā gharoñ se miTāne ke saath saath

T v ne masjidoñ ke bhī auqāt le liye

daulat kī maiñ havas meñ havā par savār thā

shohrat ne mere arz-o-samāvāt le liye

qaumoñ ko bā-shu.ūr banāne ke saath hī

ta.alīm ne qadīm rusūmāt le liye

phir dostoñ kī saf meñ koī zalzala na ho

ġhībat-kadoñ ne mere bayānāt le liye

'dīdār' chaar misroñ pe thā iktifā mirā

ġhazloñ ke shauq ne mire qat'āt le liye

miTTi se jo juDe the wo jazbaat le liye

hijrat ne khet aur mere baghat le liye

paDh kar darud ghar se safar ko main chal paDa

nam-e-nabi ne rah ke KHadshat le liye

main ek hunar ke shahr ka farzand-e-KHas tha

ghurbat ne mere sare kamalat le liye

sharm-o-haya gharon se miTane ke sath sath

T w ne masjidon ke bhi auqat le liye

daulat ki main hawas mein hawa par sawar tha

shohrat ne mere arz-o-samawat le liye

qaumon ko ba-shuur banane ke sath hi

talim ne qadim rusumat le liye

phir doston ki saf mein koi zalzala na ho

ghibat-kadon ne mere bayanat le liye

'didar' chaar misron pe tha iktifa mera

ghazlon ke shauq ne mere qat'at le liye