mizaj dard ka KHugar isi liye to hai

mizāj dard kā ḳhūgar isī liye to hai

ġham-e-firāq muqaddar isī liye to hai

tujhe ḳhabar thī mirā dil hai ā.īna jaisā

ye guftugū tirī patthar isī liye to hai

panāh le na sakā jo ḳhudā ke ghar meñ kabhī

zamāne bhar meñ vo be-ghar isī liye to hai

tumheñ to dost banāne kā shauq thā hī bahut

tumhārī piiTh meñ ḳhanjar isī liye to hai

tumhārī yaad ke bādal baras rahe haiñ yahāñ

ye āñsuoñ kā samundar isī liye to hai

tumhārī nasl kī hālat bigaḌne vaalī hai

tumhāre haath meñ sāġhar isī liye to hai

unheñ batāo buzurgoñ kā hai karam us par

'hilāl' achchhā suḳhanvar isī liye to hai

mizaj dard ka KHugar isi liye to hai

gham-e-firaq muqaddar isi liye to hai

tujhe KHabar thi mera dil hai aaina jaisa

ye guftugu teri patthar isi liye to hai

panah le na saka jo KHuda ke ghar mein kabhi

zamane bhar mein wo be-ghar isi liye to hai

tumhein to dost banane ka shauq tha hi bahut

tumhaari piTh mein KHanjar isi liye to hai

tumhaari yaad ke baadal baras rahe hain yahan

ye aansuon ka samundar isi liye to hai

tumhaari nasl ki haalat bigaDne wali hai

tumhaare hath mein saghar isi liye to hai

unhen batao buzurgon ka hai karam us par

'hilal' achchha suKHanwar isi liye to hai