mizaj-e-ishq ko jis ne qalandarana kiya

mizāj-e-ishq ko jis ne qalandarāna kiyā

kalām jis se kiyā us ne ārifāna kiyā

sitam kī dhuup ne ye kār-e-mo.ajizāna kiyā

hamārī raah meñ shafqat kā shāmiyāna kiyā

vo jis ne dil pe mire vār-e-qātilāna kiyā

usī ko maiñ ne kabhī jaan se judā na kiyā

vo ik daraḳht jahāñ saañp kā baserā hai

kisī parinde ne kab us pe āshiyāna kiyā

savāl pūchhne vaalo suno batā.ūñ maiñ

charāġh-e-dil se munavvar ġharīb-ḳhāna kiyā

isī zamīn se nisbat thī ham parindoñ ko

isī zamīn kī miTTī ko āb-o-dāna kiyā

hamāre ḳhuun kī fitrat meñ hai vafādārī

so ham ne jis se kiyā pyaar muḳhlisāna kiyā

azīz-tar jise rakkhā sañbhāl kar dil meñ

sulūk us ne bahut ham se bāġhiyāna kiyā

ḳhushī ke saath nikaltā hai ghar se kaun 'ash.har'

zarūratoñ ne safar par hameñ ravāna kiyā

mizaj-e-ishq ko jis ne qalandarana kiya

kalam jis se kiya us ne aarifana kiya

sitam ki dhup ne ye kar-e-moajizana kiya

hamari rah mein shafqat ka shamiyana kiya

wo jis ne dil pe mere war-e-qatilana kiya

usi ko main ne kabhi jaan se juda na kiya

wo ek daraKHt jahan sanp ka basera hai

kisi parinde ne kab us pe aashiyana kiya

sawal puchhne walo suno bataun main

charagh-e-dil se munawwar gharib-KHana kiya

isi zamin se nisbat thi hum parindon ko

isi zamin ki miTTi ko aab-o-dana kiya

hamare KHun ki fitrat mein hai wafadari

so hum ne jis se kiya pyar muKHlisana kiya

aziz-tar jise rakkha sanbhaal kar dil mein

suluk us ne bahut hum se baghiyana kiya

KHushi ke sath nikalta hai ghar se kaun 'ashhar'

zaruraton ne safar par hamein rawana kiya