mizaj-e-shahr jo tahrir karne nikle hain

mizāj-e-shahr jo tahrīr karne nikle haiñ

ham apne aap ko dil-gīr karne nikle haiñ

nikal ke ḳhvāb-sarā se bujhā ke chashm-e-gumāñ

ḳhayāl-o-ḳhvāb ko ta.abīr karne nikle haiñ

sajā ke aañkh meñ vahshat badan pe vīrānī

tire jamāl kī tash.hīr karne nikle haiñ

jo din kī bhiiḌ meñ ham se bichhaḌ ga.ī thī kahīñ

us ek shaam ko tasvīr karne nikle haiñ

bahut hī saada haiñ ham bhī uThā ke yaad koī

ga.e dinoñ ko jo zanjīr karne nikle haiñ

libās-e-ishq sajā kar badan pe ham 'ḳhāvar'

tilism-e-husn ko tasḳhīr karne nikle haiñ

mizaj-e-shahr jo tahrir karne nikle hain

hum apne aap ko dil-gir karne nikle hain

nikal ke KHwab-sara se bujha ke chashm-e-guman

KHayal-o-KHwab ko tabir karne nikle hain

saja ke aankh mein wahshat badan pe virani

tere jamal ki tashhir karne nikle hain

jo din ki bhiD mein hum se bichhaD gai thi kahin

us ek sham ko taswir karne nikle hain

bahut hi sada hain hum bhi uTha ke yaad koi

gae dinon ko jo zanjir karne nikle hain

libas-e-ishq saja kar badan pe hum 'KHawar'

tilism-e-husn ko tasKHir karne nikle hain