mizaj rakhte ho shairana to pas aana

mizāj rakhte ho shā'irāna to paas aanā

suḳhan-sarā.ī ho mo’jizāna to paas aanā

tavīl qurbat meñ 'aib-jūī ke mas.ale haiñ

so duur rah kar ho paas aanā to paas aanā

farār hone ko merī yādoñ kī dastaras se

na DhūñD paao koī bahāna to paas aanā

bharam hai tum ko tumhāre dar par khaḌe mileñge

jo merī rāhoñ pe chal ke aanā to paas aanā

ki jhuuT makr-o-fareb se hai gurez mujh ko

jo baat karte ho munsifāna to paas aanā

ḳhamosh dariyā ke pāniyoñ meñ bhañvar haiñ kitne

agar ye chāho tum āzmānā to paas aanā

masarratoñ ne kahā thā hañs kar 'ayāz' ik din

udāsiyoñ se jab uub jaanā to paas aanā

mizaj rakhte ho sha'irana to pas aana

suKHan-sarai ho mo’jizana to pas aana

tawil qurbat mein 'aib-jui ke masale hain

so dur rah kar ho pas aana to pas aana

farar hone ko meri yaadon ki dastaras se

na DhunD pao koi bahana to pas aana

bharam hai tum ko tumhaare dar par khaDe milenge

jo meri rahon pe chal ke aana to pas aana

ki jhuT makr-o-fareb se hai gurez mujh ko

jo baat karte ho munsifana to pas aana

KHamosh dariya ke paniyon mein bhanwar hain kitne

agar ye chaho tum aazmana to pas aana

masarraton ne kaha tha hans kar 'ayaz' ek din

udasiyon se jab ub jaana to pas aana