moatabar hote hue jaan-soz afsane na the

mo'atabar hote hue jāñ-soz afsāne na the

log dīvāne the lekin itne dīvāne na the

un ke ruḳh se jab naqāb uTThī to ḳhāmoshī rahī

sham' jab raushan huī mahfil meñ parvāne na the

ashk the har chand lekin zabt par qaabū bhī thā

is tarah chhalke hue āñkhoñ ke paimāne na the

jis taraf nazreñ uThātā huuñ udhar vīrāniyāñ

shahr se bāhar to shāyad itne vīrāne na the

un kī mahfil meñ chale jaate magar mushkil ye thī

rāhdārī ke hamāre paas parvāne na the

ham muḳhātib kis se hote kaun thā apnā rafīq

log the mahfil meñ lekin jaane pahchāne na the

apnī barbādī kā zimma-dār Thahrā.ūñ kise

chaar jānib apne hī apne the begāne na the

dāstān-e-ġham ko sun kar yuuñ hue vo shādmāñ

āñsuoñ meñ jaise pinhāñ ġham ke afsāne na the

anjuman meñ un kī ham jaane ko jaate ai 'sirāj'

un ke qābil jab hamāre paas nazrāne na the

mo'atabar hote hue jaan-soz afsane na the

log diwane the lekin itne diwane na the

un ke ruKH se jab naqab uTThi to KHamoshi rahi

sham' jab raushan hui mahfil mein parwane na the

ashk the har chand lekin zabt par qabu bhi tha

is tarah chhalke hue aankhon ke paimane na the

jis taraf nazren uThata hun udhar viraniyan

shahr se bahar to shayad itne virane na the

un ki mahfil mein chale jate magar mushkil ye thi

rahdari ke hamare pas parwane na the

hum muKHatib kis se hote kaun tha apna rafiq

log the mahfil mein lekin jaane pahchane na the

apni barbaadi ka zimma-dar Thahraun kise

chaar jaanib apne hi apne the begane na the

dastan-e-gham ko sun kar yun hue wo shadman

aansuon mein jaise pinhan gham ke afsane na the

anjuman mein un ki hum jaane ko jate ai 'siraj'

un ke qabil jab hamare pas nazrane na the