moajaze ka dar khula aur ek asa raushan hua

mo.ajaze kā dar khulā aur ik asā raushan huā

duur gahre pāniyoñ meñ rāsta raushan huā

jaane kitne sūrajoñ kā faiz hāsil hai use

is mukammal raushnī se jo milā raushan huā

aañkh vāloñ ne churā lī raushnī saarī to phir

ek andhe kī hathelī par diyā raushan huā

ek vahshat dā.era-dar-dā.era phirtī rahī

ek sahrā silsila-dar-silsila raushan huā

mustaqil ik be-yaqīnī, ik musalsal intizār

phir achānak ek chehra jā-ba-jā raushan huā

aaj phir jalne lage biite hue kuchh ḳhaas pal

aaj phir ik yaad kā ātish-kada raushan huā

jaane kis aalam meñ likkhī ye ġhazal tum ne 'nabīl'

ḳhāmushī bujhne lagī, shahr-e-sadā raushan huā

moajaze ka dar khula aur ek asa raushan hua

dur gahre paniyon mein rasta raushan hua

jaane kitne surajon ka faiz hasil hai use

is mukammal raushni se jo mila raushan hua

aankh walon ne chura li raushni sari to phir

ek andhe ki hatheli par diya raushan hua

ek wahshat daera-dar-daera phirti rahi

ek sahra silsila-dar-silsila raushan hua

mustaqil ek be-yaqini, ek musalsal intizar

phir achanak ek chehra ja-ba-ja raushan hua

aaj phir jalne lage bite hue kuchh KHas pal

aaj phir ek yaad ka aatish-kada raushan hua

jaane kis aalam mein likkhi ye ghazal tum ne 'nabil'

KHamushi bujhne lagi, shahr-e-sada raushan hua