moajiza ye bhi dikhaya maine

mo.ajiza ye bhī dikhāyā maiñ ne

apne qātil ko rulāyā maiñ ne

ḳhud hī zaḳhmoñ se sajāyā dil ko

aur phir jashn manāyā maiñ ne

ziist be-nūr huī jaatī thī

phir lahū dil kā jalāyā maiñ ne

chāñd aur phuul hī kyā har shai meñ

bas tirā aks hī paayā maiñ ne

terī yādoñ ko sajā kar dil meñ

ik sanam-ḳhāna banāyā maiñ ne

shahr-e-ehsās thā vo ḳhud bhī 'nigār'

but-kada dil kā jo Dhāyā maiñ ne

moajiza ye bhi dikhaya main ne

apne qatil ko rulaya main ne

KHud hi zaKHmon se sajaya dil ko

aur phir jashn manaya main ne

zist be-nur hui jati thi

phir lahu dil ka jalaya main ne

chand aur phul hi kya har shai mein

bas tera aks hi paya main ne

teri yaadon ko saja kar dil mein

ek sanam-KHana banaya main ne

shahr-e-ehsas tha wo KHud bhi 'nigar'

but-kada dil ka jo Dhaya main ne