mohabbat ab adawat lag rahi hai

mohabbat ab adāvat lag rahī hai

baḌī mushkil meñ qudrat lag rahī hai

faqīh-e-shahr to ḳhud pur-sukūñ hai

magar suulī pe ummat lag rahī hai

tumhāre qatl se lagtā hai aise

mire sar kī bhī qīmat lag rahī hai

fazāoñ meñ lahū kī bū basī hai

bahut bechain fitrat lag rahī hai

maiñ apne ahd-e-nau kī karbalā huuñ

mire ḳhuuñ meñ shahādat lag rahī hai

muqaddar so rahā hai ḳhaak oḌhe

zamīn-e-saḳht rāhat lag rahī hai

fasīl-e-shahr par to raushnī hai

magar daao pe izzat lag rahī hai

maiñ apne mulk meñ aaya huuñ jab se

ajab bechain sūrat lag rahī hai

muñDeroñ par kahīñ chiḌiyāñ nahīñ haiñ

ajab is ghar kī hālat lag rahī hai

zamīñ meñ nafrateñ boī ga.ī haiñ

harī shāḳhoñ pe tohmat lag rahī hai

sukūñ meñ haiñ munāfiq shahr bhar ke

hameñ ye saañs zillat lag rahī hai

vahāñ masrūfiyat thī chaar jānib

yahāñ fursat hī fursat lag rahī hai

ruke ye qāfila-e-jāñ kahīñ pe

be-ma.anī ab masāfat lag rahī hai

maiñ apne aap ko ġharqāb kar duuñ

bachāv kī ye sūrat lag rahī hai

ḳhudāyā mushkileñ āsān kar de

mujhe ghar meñ bhī vahshat lag rahī hai

vahāñ bechain hai vo kal se 'safdar'

use merī zarūrat lag rahī hai

mohabbat ab adawat lag rahi hai

baDi mushkil mein qudrat lag rahi hai

faqih-e-shahr to KHud pur-sukun hai

magar suli pe ummat lag rahi hai

tumhaare qatl se lagta hai aise

mere sar ki bhi qimat lag rahi hai

fazaon mein lahu ki bu basi hai

bahut bechain fitrat lag rahi hai

main apne ahd-e-nau ki karbala hun

mere KHun mein shahadat lag rahi hai

muqaddar so raha hai KHak oDhe

zamin-e-saKHt rahat lag rahi hai

fasil-e-shahr par to raushni hai

magar dao pe izzat lag rahi hai

main apne mulk mein aaya hun jab se

ajab bechain surat lag rahi hai

munDeron par kahin chiDiyan nahin hain

ajab is ghar ki haalat lag rahi hai

zamin mein nafraten boi gai hain

hari shaKHon pe tohmat lag rahi hai

sukun mein hain munafiq shahr bhar ke

hamein ye sans zillat lag rahi hai

wahan masrufiyat thi chaar jaanib

yahan fursat hi fursat lag rahi hai

ruke ye qafila-e-jaan kahin pe

be-mani ab masafat lag rahi hai

main apne aap ko gharqab kar dun

bachaw ki ye surat lag rahi hai

KHudaya mushkilen aasan kar de

mujhe ghar mein bhi wahshat lag rahi hai

wahan bechain hai wo kal se 'safdar'

use meri zarurat lag rahi hai