mohabbat aur mohabbat ka shajar baqi rahega

mohabbat aur mohabbat kā shajar baaqī rahegā

chale jā.eñge ham lekin safar baaqī rahegā

kisī dastak kī kānoñ meñ sadā aatī rahegī

koī naqsh-e-qadam dahlīz par baaqī rahegā

abhī se kyoñ bujhā deñ apne dil kī saarī sham.eñ

sahar hone tak imkān-e-sahar baaqī rahegā

baḌhā aatā hai sail-e-be-yaqīnī har taraf se

to is sailāb meñ kyā merā ghar baaqī rahegā

giregā ek din sar par ye niilā āsmāñ bhī

duāoñ meñ bhalā kab tak asar baaqī rahegā

jo tum chāho to is bartan ko chaknā-chūr kar do

magar phir bhī nishān-e-kūza-gar baaqī rahegā

abhī ye faisla mahfūz hai lauh-e-ufuq par

kaTegī kis kī gardan kis kā sar baaqī rahegā

jise be-maslahat be-ḳhauf ho kar maiñ ne likkhā

vahī bas ek harf-e-mo'tabar baaqī rahegā

milā hai TuuT kar jo muddatoñ ke baad 'ashfāq'

usī se phir bichhaḌ jaane kā Dar baaqī rahegā

mohabbat aur mohabbat ka shajar baqi rahega

chale jaenge hum lekin safar baqi rahega

kisi dastak ki kanon mein sada aati rahegi

koi naqsh-e-qadam dahliz par baqi rahega

abhi se kyon bujha den apne dil ki sari shamen

sahar hone tak imkan-e-sahar baqi rahega

baDha aata hai sail-e-be-yaqini har taraf se

to is sailab mein kya mera ghar baqi rahega

girega ek din sar par ye nila aasman bhi

duaon mein bhala kab tak asar baqi rahega

jo tum chaho to is bartan ko chakna-chur kar do

magar phir bhi nishan-e-kuza-gar baqi rahega

abhi ye faisla mahfuz hai lauh-e-ufuq par

kaTegi kis ki gardan kis ka sar baqi rahega

jise be-maslahat be-KHauf ho kar main ne likkha

wahi bas ek harf-e-mo'tabar baqi rahega

mila hai TuT kar jo muddaton ke baad 'ashfaq'

usi se phir bichhaD jaane ka Dar baqi rahega