mohabbat banTne nikle the patthar le ke ghar lauTe

mohabbat bāñTne nikle the patthar le ke ghar lauTe

bahut se dasht chhāne aur ho ke dar-ba-dar lauTe

hamārī soch se dil tak baḌī lambī masāfat hai

chalo ab dekhte haiñ ki kahāñ se ye nazar lauTe

jahāñ meñ masnadeñ ab be-hunar ābād karte haiñ

jabhī to le ke āñkheñ nam sabhī ahl-e-hunar lauTe

liye ham kāñch kā dil bar-sar-e-bāzār baiThe haiñ

the patthar jinkī jholī ḳhush vahī to bāzīgar lauTe

vo jhūTe log jo mil kar hamīñ ko jhuuT kar deñge

unhīñ ko aazmā kar ham bhī apnī rahguzar lauTe

qarār-e-jāñ banāne ko bahāne aur kyā kam the

bhalā 'mumtāz' le ke kaun yuuñ zaḳhmī jigar lauTe

mohabbat banTne nikle the patthar le ke ghar lauTe

bahut se dasht chhane aur ho ke dar-ba-dar lauTe

hamari soch se dil tak baDi lambi masafat hai

chalo ab dekhte hain ki kahan se ye nazar lauTe

jahan mein masnaden ab be-hunar aabaad karte hain

jabhi to le ke aankhen nam sabhi ahl-e-hunar lauTe

liye hum kanch ka dil bar-sar-e-bazar baiThe hain

the patthar jinki jholi KHush wahi to bazigar lauTe

wo jhuTe log jo mil kar hamin ko jhuT kar denge

unhin ko aazma kar hum bhi apni rahguzar lauTe

qarar-e-jaan banane ko bahane aur kya kam the

bhala 'mumtaz' le ke kaun yun zaKHmi jigar lauTe