mohabbat jada hai manzil nahin hai

mohabbat jaada hai manzil nahīñ hai

ye mushkil āḳhirī mushkil nahīñ hai

dil-e-rah-rav meñ haiñ kuchh aur ḳhatre

ḳhayāl-e-dūrī-e-manzil nahīñ hai

ḳhirad bātil ḳhirad par naaz bātil

magar ye to junūñ bātil nahīñ hai

ye dil be-mehr bhī hai bevafā bhī

nahīñ ye dil to merā dil nahīñ hai

Darātā hai mujhe yuuñ ḳhanda-e-barq

mujhe andesha-e-hāsil nahīñ hai

maiñ sab kuchh jāntā huuñ apnā anjām

magar iz.hār ke qābil nahīñ hai

miyān-e-qa.ar-e-dariyā hai safīna

nahīñ ai nāḳhudā sāhil nahīñ hai

yahāñ mehr-o-vafā nādāniyāñ haiñ

ye duniyā ishq ke qābil nahīñ hai

ye hai marhūm ummīdoñ kā madfan

kabhī dil thā magar ab dil nahīñ hai

mohabbat jada hai manzil nahin hai

ye mushkil aaKHiri mushkil nahin hai

dil-e-rah-raw mein hain kuchh aur KHatre

KHayal-e-duri-e-manzil nahin hai

KHirad baatil KHirad par naz baatil

magar ye to junun baatil nahin hai

ye dil be-mehr bhi hai bewafa bhi

nahin ye dil to mera dil nahin hai

Daraata hai mujhe yun KHanda-e-barq

mujhe andesha-e-hasil nahin hai

main sab kuchh jaanta hun apna anjam

magar izhaar ke qabil nahin hai

miyan-e-qar-e-dariya hai safina

nahin ai naKHuda sahil nahin hai

yahan mehr-o-wafa nadaniyan hain

ye duniya ishq ke qabil nahin hai

ye hai marhum ummidon ka madfan

kabhi dil tha magar ab dil nahin hai