mohabbat jis ko kahte hain kabhi baatil nahin hoti

mohabbat jis ko kahte haiñ kabhī bātil nahīñ hotī

fareb-e-‘aql ho jaa.e fareb-e-dil nahīñ hotī

vo raahī huuñ ki jis ke sāmne manzil nahīñ hotī

yahī āvārgī shāyad kisī qābil nahīñ hotī

ta'ajjub hai kisī sūrat nazar qaa.il nahīñ hotī

tabī'at to tumhārī yaad se ġhāfil nahīñ hotī

ḳhamoshī ho yā goyā.ī bahar-hālat zabāñ apnī

nahīñ hotī tumhāre naam se ġhāfil nahīñ hotī

tamanna Dūbnā hī jāntī hai bahr-e-ulfat meñ

ye vo kashtī hai jo sharminda-e-sāhil nahīñ hotī

bahar-sūrat mayassar hai tirī qurbat bhī ḳhalvat bhī

magar dīdār kī daulat kabhī hāsil nahīñ hotī

nahīñ jhuktā kabhī sajde meñ sar ahl-e-tarīqat kā

gunāhoñ kī fazā meñ be-ḳhudī shāmil nahīñ hotī

dam-e-tūfāñ hilā detī hai dil maġhrūr maujoñ ke

du'ā meñ itnī gahrā.ī lab-e-sāhil nahīñ hotī

hamesha 'shād' rakhtī hai mohabbat ham-ḳhayāloñ kī

magar ye pārsāoñ meñ kabhī hāsil nahīñ hotī

mohabbat jis ko kahte hain kabhi baatil nahin hoti

fareb-e-‘aql ho jae fareb-e-dil nahin hoti

wo rahi hun ki jis ke samne manzil nahin hoti

yahi aawargi shayad kisi qabil nahin hoti

ta'ajjub hai kisi surat nazar qail nahin hoti

tabi'at to tumhaari yaad se ghafil nahin hoti

KHamoshi ho ya goyai bahar-haalat zaban apni

nahin hoti tumhaare nam se ghafil nahin hoti

tamanna Dubna hi jaanti hai bahr-e-ulfat mein

ye wo kashti hai jo sharminda-e-sahil nahin hoti

bahar-surat mayassar hai teri qurbat bhi KHalwat bhi

magar didar ki daulat kabhi hasil nahin hoti

nahin jhukta kabhi sajde mein sar ahl-e-tariqat ka

gunahon ki faza mein be-KHudi shamil nahin hoti

dam-e-tufan hila deti hai dil maghrur maujon ke

du'a mein itni gahrai lab-e-sahil nahin hoti

hamesha 'shad' rakhti hai mohabbat ham-KHayalon ki

magar ye parsaon mein kabhi hasil nahin hoti