mohabbat ka fasana humse dohraya nahin jata

mohabbat kā fasāna ham se dohrāyā nahīñ jaatā

bas ab ham se fareb-e-ārzū khāyā nahīñ jaatā

yahāñ tak to mujhe dast-e-karam par naaz hai un ke

agar ab haath phailā.ūñ to phailāyā nahīñ jaatā

tamāsha dekhne vaale tamāsha ban ke rah jaa.eñ

ba-qadr-e-dard tum se dil ko taḌpāyā nahīñ jaatā

ye aalam hai qafas kā dar khulā hai sehn-e-gulshan meñ

magar sayyād ko ab chhoḌ kar jaayā nahīñ jaatā

mujhe dekho ki ġhairoñ ko bhī siine se lagātā huuñ

magar tum se to apnoñ ko bhī apnāyā nahīñ jaatā

jo āñkheñ dekh letī haiñ ḳhizāñ kā daur phir un se

bahāroñ kā fareb-e-rañg-o-bū khāyā nahīñ jaatā

maiñ un ko be-ruḳhī kā kis liye ilzām duuñ 'ja.afar'

añdhere meñ to apnā do-qadam saayā nahīñ jaatā

mohabbat ka fasana hum se dohraya nahin jata

bas ab hum se fareb-e-arzu khaya nahin jata

yahan tak to mujhe dast-e-karam par naz hai un ke

agar ab hath phailaun to phailaya nahin jata

tamasha dekhne wale tamasha ban ke rah jaen

ba-qadr-e-dard tum se dil ko taDpaya nahin jata

ye aalam hai qafas ka dar khula hai sehn-e-gulshan mein

magar sayyaad ko ab chhoD kar jaya nahin jata

mujhe dekho ki ghairon ko bhi sine se lagata hun

magar tum se to apnon ko bhi apnaya nahin jata

jo aankhen dekh leti hain KHizan ka daur phir un se

bahaaron ka fareb-e-rang-o-bu khaya nahin jata

main un ko be-ruKHi ka kis liye ilzam dun 'jafar'

andhere mein to apna do-qadam saya nahin jata