mohabbat ka rag-o-pai mein meri ruh-e-rawan hona

mohabbat kā rag-o-pai meñ mirī rūh-e-ravāñ honā

mubārak har nafas ko ik hayāt-e-jāvedāñ honā

hamāre dil ko aa.e kis tarah phir shādmāñ honā

tirī nazroñ ne sīkhā hī nahīñ jab mehrbāñ honā

tire kūche meñ honā us pe terā āstāñ honā

mubārak tere kūche kī zamīñ ko āsmāñ honā

ye hālat hai ki bedārī bhī hai ik ḳhvāb kā aalam

ma.āz-allāh apnā ḳhūgar-e-ḳhvāb-e-girāñ honā

use ḳhush kar sakeñgī kyā bahāreñ zindagānī kī

chaman meñ jis ne dekhā ho bahāroñ kā ḳhizāñ honā

jo bad-qismat tire ġham kī masarrat se haiñ nā-vāqif

vo kyā jāneñ kise kahte haiñ dil kā shādmāñ honā

mujhe āñkheñ dikhā.egī bhalā kyā gardish-e-daurāñ

mirī nazroñ ne dekhā hai tirā nā-mehrbāñ honā

jabīñ o āstāñ ke darmiyāñ sajde hoñ kyuuñ haa.il

jabīñ ko ho mayassar kaash jazb-e-āstāñ honā

havas-kārān-e-ishrat aah kyā samjheñge ai 'aḳhtar'

bahut dushvār hai zauq-e-alam kā rāz-dāñ honā

mohabbat ka rag-o-pai mein meri ruh-e-rawan hona

mubarak har nafas ko ek hayat-e-jawedan hona

hamare dil ko aae kis tarah phir shadman hona

teri nazron ne sikha hi nahin jab mehrban hona

tere kuche mein hona us pe tera aastan hona

mubarak tere kuche ki zamin ko aasman hona

ye haalat hai ki bedari bhi hai ek KHwab ka aalam

maaz-allah apna KHugar-e-KHwab-e-giran hona

use KHush kar sakengi kya bahaaren zindagani ki

chaman mein jis ne dekha ho bahaaron ka KHizan hona

jo bad-qismat tere gham ki masarrat se hain na-waqif

wo kya jaanen kise kahte hain dil ka shadman hona

mujhe aankhen dikhaegi bhala kya gardish-e-dauran

meri nazron ne dekha hai tera na-mehrban hona

jabin o aastan ke darmiyan sajde hon kyun hail

jabin ko ho mayassar kash jazb-e-astan hona

hawas-karan-e-ishrat aah kya samjhenge ai 'aKHtar'

bahut dushwar hai zauq-e-alam ka raaz-dan hona