mohabbat ka taqaza hai ghamon se chur ho jaana

mohabbat kā taqāzā hai ġhamoñ se chuur ho jaanā

kabhī hañsnā kabhī ronā kabhī majbūr ho jaanā

tumhārī kaj-adā.ī ne bhī mujh se khel khelā hai

mirā badnām ho jaanā tirā mash.hūr ho jaanā

hamāre dil kā afsāna jahāñ tak yaad aatā hai

faqat pahlī nazar meñ gir ke nā-manzūr ho jaanā

mirī piine kī aadat bhī ajab se gul khilātī hai

jahāñ dekhī hasīñ āñkheñ vahīñ maḳhmūr ho jaanā

zamāna bhar to patthar hai faqat haiñ ābgīne ham

zarā sī Thes kyā pahuñchī ki chaknā-chūr ho jaanā

kabhī jo aa.ina dekhā vahīñ sharmā ga.e ḳhud se

unheñ aatā hai kaise husn se maġhrūr ho jaanā

kamāl un kī tabī.at hai kabhī bigḌe kabhī sañvre

kareñ jo lab-kushā.ī bhī vahī dastūr ho jaanā

hamārī hālat-e-dil kā bharosa bhī nahīñ 'barham'

jahāñ manzil nazar aa.e vahāñ se duur ho jaanā

mohabbat ka taqaza hai ghamon se chur ho jaana

kabhi hansna kabhi rona kabhi majbur ho jaana

tumhaari kaj-adai ne bhi mujh se khel khela hai

mera badnam ho jaana tera mashhur ho jaana

hamare dil ka afsana jahan tak yaad aata hai

faqat pahli nazar mein gir ke na-manzur ho jaana

meri pine ki aadat bhi ajab se gul khilati hai

jahan dekhi hasin aankhen wahin maKHmur ho jaana

zamana bhar to patthar hai faqat hain aabgine hum

zara si Thes kya pahunchi ki chakna-chur ho jaana

kabhi jo aaina dekha wahin sharma gae KHud se

unhen aata hai kaise husn se maghrur ho jaana

kamal un ki tabiat hai kabhi bigDe kabhi sanwre

karen jo lab-kushai bhi wahi dastur ho jaana

hamari haalat-e-dil ka bharosa bhi nahin 'barham'

jahan manzil nazar aae wahan se dur ho jaana