mohabbat ka tujhe irfan bhi hai

mohabbat kā tujhe irfān bhī hai

mohabbat kufr bhī īmān bhī hai

tazād-e-hazrat-e-insāñ na pūchho

farishta bhī hai ye shaitān bhī hai

yahī sābit huā hai zindagī se

jo daanā hai vahī nādān bhī hai

bahut be-rabt hai rūdād-e-hastī

is afsāne kā kuchh unvān bhī hai

isī kā zindagī hai naam shāyad

kuchh uljhan bhī kuchh itmīnān bhī hai

na khā maujoñ kī ḳhāmoshī se dhokā

isī parde meñ ik tūfān bhī hai

nikāleñ kis tarah hasrat ko dil se

musāfir bhī hai ye mehmān bhī hai

ye jiinā haañ ye jiinā haañ ye jiinā

bahut mushkil bahut āsān bhī hai

ḳhudā lagtī kabhī to baat kah de

tirā kuchh diin kuchh īmān bhī hai

navāzish sī navāzish ho rahī hai

karam bhī aap kā ehsān bhī hai

suḳhan par aap nāzāñ to haiñ 'tālib'

suḳhan meñ aap ke kuchh jaan bhī hai

ye hindū ye musalmāñ ye masīhī

magar in meñ koī insān bhī hai

mohabbat ka tujhe irfan bhi hai

mohabbat kufr bhi iman bhi hai

tazad-e-hazrat-e-insan na puchho

farishta bhi hai ye shaitan bhi hai

yahi sabit hua hai zindagi se

jo dana hai wahi nadan bhi hai

bahut be-rabt hai rudad-e-hasti

is afsane ka kuchh unwan bhi hai

isi ka zindagi hai nam shayad

kuchh uljhan bhi kuchh itminan bhi hai

na kha maujon ki KHamoshi se dhoka

isi parde mein ek tufan bhi hai

nikalen kis tarah hasrat ko dil se

musafir bhi hai ye mehman bhi hai

ye jina han ye jina han ye jina

bahut mushkil bahut aasan bhi hai

KHuda lagti kabhi to baat kah de

tera kuchh din kuchh iman bhi hai

nawazish si nawazish ho rahi hai

karam bhi aap ka ehsan bhi hai

suKHan par aap nazan to hain 'talib'

suKHan mein aap ke kuchh jaan bhi hai

ye hindu ye musalman ye masihi

magar in mein koi insan bhi hai