mohabbat karne walon ko mohabbat aazmati hai

mohabbat karne vāloñ ko mohabbat āzmātī hai

kisī kī aan jaatī hai kisī kī jaan jaatī hai

taḳhayyul kī gul-afshānī ġhazal kā naam paatī hai

kisī kī yaad se zaḳhmoñ kī duniyā muskurātī hai

vufūr-e-ġham se sham-e-zindagānī thartharātī hai

mohabbat kī har ik dhaḌkan vafā ko āzmātī hai

kisī ke āriz-o-lab kī milī hai raushnī jab se

bahār-e-zindagī rangīniyoñ meñ Duub jaatī hai

mire baazū pe zulfoñ kī bharī barsāt hotī thī

vo saa.at yaad aatī hai vo saa.at yaad aatī hai

vo rang-o-nūr kī mahfil bahāroñ kī vo ra.anā.ī

mohabbat ke vafā-parvar fasānoñ ko sunātī hai

kisī kī yaad meñ gum ho ga.ī hai raushnī dil kī

jo gāhe-gāhe rāh-e-ashk-e-ġham ko jagmagātī hai

tumhārī zulf kā saaya jo mil jaa.e to ruk jā.ūñ

thakā-māñda huā huuñ dhuup ġham kī chilchilātī hai

'zamīr' anjām-e-ulfat par laraz jaatā hai dil aksar

hañsī aatī hai jis dam aañkh merī DabDabātī hai

mohabbat karne walon ko mohabbat aazmati hai

kisi ki aan jati hai kisi ki jaan jati hai

taKHayyul ki gul-afshani ghazal ka nam pati hai

kisi ki yaad se zaKHmon ki duniya muskuraati hai

wufur-e-gham se sham-e-zindagani thartharaati hai

mohabbat ki har ek dhaDkan wafa ko aazmati hai

kisi ke aariz-o-lab ki mili hai raushni jab se

bahaar-e-zindagi ranginiyon mein Dub jati hai

mere bazu pe zulfon ki bhari barsat hoti thi

wo saat yaad aati hai wo saat yaad aati hai

wo rang-o-nur ki mahfil bahaaron ki wo ranai

mohabbat ke wafa-parwar fasanon ko sunati hai

kisi ki yaad mein gum ho gai hai raushni dil ki

jo gahe-gahe rah-e-ashk-e-gham ko jagmagati hai

tumhaari zulf ka saya jo mil jae to ruk jaun

thaka-manda hua hun dhup gham ki chilchilati hai

'zamir' anjam-e-ulfat par laraz jata hai dil aksar

hansi aati hai jis dam aankh meri DabDabaati hai