mohabbat ke rangin mausam na badle

mohabbat ke rangīn mausam na badle

zamāna to badlā magar ham na badle

hasīñ hai bahut silsila shām-e-ġham kā

agar aap kī zulf-e-barham na badle

hai dilkash bahut misl-e-gesū-e-jānāñ

ḳhudāyā ye kaifiyyat-e-ġham na badle

ye shoḳh āñkheñ har samt chehroñ kī jannat

duā kījiye ab ye aalam na badle

mahaktī raheñgī sitāroñ kī fasleñ

agar mausam-e-chashm-e-pur-nam na badle

ḳhirad ne diye kitne paiġhām lekin

kisī tarah bhī ibn-e-ādam na badle

nikhartī rahī gardish-e-vaqt paiham

hasīnoñ ke gesu-e-pur-ḳham na badle

ġhazal yuuñ hī 'shabbīr' kahtā rahūñ maiñ

mirī sher-goī kā aalam na badle

mohabbat ke rangin mausam na badle

zamana to badla magar hum na badle

hasin hai bahut silsila sham-e-gham ka

agar aap ki zulf-e-barham na badle

hai dilkash bahut misl-e-gesu-e-jaanan

KHudaya ye kaifiyyat-e-gham na badle

ye shoKH aankhen har samt chehron ki jannat

dua kijiye ab ye aalam na badle

mahakti rahengi sitaron ki faslen

agar mausam-e-chashm-e-pur-nam na badle

KHirad ne diye kitne paigham lekin

kisi tarah bhi ibn-e-adam na badle

nikharti rahi gardish-e-waqt paiham

hasinon ke gesu-e-pur-KHam na badle

ghazal yun hi 'shabbir' kahta rahun main

meri sher-goi ka aalam na badle