mohabbat ke ruKH-e-raushan se nurani nahin jati

mohabbat ke ruḳh-e-raushan se nūrānī nahīñ jaatī

kisī chashm-e-basīrat se bhī tābānī nahīñ jaatī

rahā ho qurb-e-shāhāñ meñ satā.ish ke liye be-shak

magar patthar ke but se sift-e-sultānī nahīñ jaatī

kisī mushkil se mushkil kā nipaTnā sahl hai lekin

kisī sūrat bhī āsānī se āsānī nahīñ jaatī

judā.ī meñ to ho jaatī hai kashtī aañkh kī putlī

jo aa jaatī hai āñkhoñ meñ vo tuġhyānī nahīñ jaatī

ḳhirad ne laakh samjhāyā ki mujh se dostī kar le

dil-e-nādāñ kī phir bhī tarz-e-nādānī nahīñ jaatī

mirī hasrat bhī ik parda-nashīñ ḳhātūn hai sāhab

kahīñ be-parda merī rāt-kī-rānī nahīñ jaatī

vajah is kī batātā hī nahīñ hai aa.ina apnā

ki kyuuñ ham se hamārī shakl pahchānī nahīñ jaatī

bahār aatī hai sahrā meñ to aurat ke tabassum se

tabassum ke binā to ghar kī vīrānī nahīñ jaatī

likhā hai us kī qismat meñ sadā bechain rahnā hī

mohabbat meñ to is dil kī pareshānī nahīñ jaatī

dil-e-āshiq yā zulf-e-nāznīñ donoñ raheñ barham

kisī 'panchhī' se rakkhī un kī nigarānī nahīñ jaatī

mohabbat ke ruKH-e-raushan se nurani nahin jati

kisi chashm-e-basirat se bhi tabani nahin jati

raha ho qurb-e-shahan mein sataish ke liye be-shak

magar patthar ke but se sift-e-sultani nahin jati

kisi mushkil se mushkil ka nipaTna sahl hai lekin

kisi surat bhi aasani se aasani nahin jati

judai mein to ho jati hai kashti aankh ki putli

jo aa jati hai aankhon mein wo tughyani nahin jati

KHirad ne lakh samjhaya ki mujh se dosti kar le

dil-e-nadan ki phir bhi tarz-e-nadani nahin jati

meri hasrat bhi ek parda-nashin KHatun hai sahab

kahin be-parda meri raat-ki-rani nahin jati

wajah is ki batata hi nahin hai aaina apna

ki kyun hum se hamari shakl pahchani nahin jati

bahaar aati hai sahra mein to aurat ke tabassum se

tabassum ke bina to ghar ki virani nahin jati

likha hai us ki qismat mein sada bechain rahna hi

mohabbat mein to is dil ki pareshani nahin jati

dil-e-ashiq ya zulf-e-naznin donon rahen barham

kisi 'panchhi' se rakkhi un ki nigarani nahin jati