mohabbat ki alamat ho gai hai

mohabbat kī alāmat ho ga.ī hai

ye kis be-kas kī rehlat ho ga.ī hai

koī maqsad nahīñ hai zindagī kā

hameñ jiine kī aadat ho ga.ī hai

abhī tak kyuuñ ye patte TūTte haiñ

havā to kab kī ruḳhsat ho ga.ī hai

koī tāqat dabā saktī nahīñ ab

ki zehnoñ meñ baġhāvat ho ga.ī hai

jise maiñ qatl kar ke ḳhush huā thā

har ā.īna vo sūrat ho ga.ī hai

garebāñ meñ abas kyuuñ jhāñkte ho

tumheñ kaisī ye vahshat ho ga.ī hai

ibādat ik zarūrat se thī pahle

zarūrat ab ibādat ho ga.ī hai

nahīñ hai dhyān apnī zindagī kā

ki ab bachchoñ se ulfat ho ga.ī hai

hamārī zindagī hī kyā hai 'ḳhālid'

azīzoñ kī amānat ho ga.ī hai

mohabbat ki alamat ho gai hai

ye kis be-kas ki rehlat ho gai hai

koi maqsad nahin hai zindagi ka

hamein jine ki aadat ho gai hai

abhi tak kyun ye patte TuTte hain

hawa to kab ki ruKHsat ho gai hai

koi taqat daba sakti nahin ab

ki zehnon mein baghawat ho gai hai

jise main qatl kar ke KHush hua tha

har aaina wo surat ho gai hai

gareban mein abas kyun jhankte ho

tumhein kaisi ye wahshat ho gai hai

ibaadat ek zarurat se thi pahle

zarurat ab ibaadat ho gai hai

nahin hai dhyan apni zindagi ka

ki ab bachchon se ulfat ho gai hai

hamari zindagi hi kya hai 'KHalid'

azizon ki amanat ho gai hai