mohabbat ki hararat se hua sara lahu aatish

mohabbat kī harārat se huā saarā lahū ātish

taḳhayyul shabnamī hai garche merī guftugū ātish

nigār-e-zindagī meñ us ke dam se hī ujālā hai

chaman vīrāna hotā gar na hotī aarzū ātish

ḳhush aatī hai ham āshufta-saroñ ko us kī ye aadat

kabhī mānind-e-shabnam aur hotā hai kabhī ātish

jhulas jaatī haiñ vo āñkheñ jinheñ kuchh ḳhvāb bunñe the

banā dī ahd-e-nau kī nafratoñ ne justujū ātish

ibārat aaj kal kī zindagī hai in anāsir se

siyāsat āmriyat ḳhūn-e-nāhaq kū-ba-kū ātish

tamāniyyat kī lāzim shart hai ḳhush-niyyatī varna

tag-o-dau be-bizā.at aur saarī hāo-hū ātish

'zafar' se ab to nazreñ bhī milānā āzmā.ish hai

ki garmī-e-jahāñ se ho gayā hai mū-ba-mū ātish

mohabbat ki hararat se hua sara lahu aatish

taKHayyul shabnami hai garche meri guftugu aatish

nigar-e-zindagi mein us ke dam se hi ujala hai

chaman virana hota gar na hoti aarzu aatish

KHush aati hai hum aashufta-saron ko us ki ye aadat

kabhi manind-e-shabnam aur hota hai kabhi aatish

jhulas jati hain wo aankhen jinhen kuchh KHwab bunne the

bana di ahd-e-nau ki nafraton ne justuju aatish

ibarat aaj kal ki zindagi hai in anasir se

siyasat aamriyat KHun-e-nahaq ku-ba-ku aatish

tamaniyyat ki lazim shart hai KHush-niyyati warna

tag-o-dau be-bizaat aur sari hao-hu aatish

'zafar' se ab to nazren bhi milana aazmaish hai

ki garmi-e-jahan se ho gaya hai mu-ba-mu aatish