mohabbat ki intiha chahta hun

mohabbat kī intihā chāhtā huuñ

unheñ hāsil-e-ibtidā chāhtā huuñ

use barmalā dekhnā chāhtā huuñ

adab ai mohabbat ye kyā chāhtā huuñ

ġham-e-ishq kā silsilā chāhtā huuñ

maiñ tujh tak tirā vāstā chāhtā huuñ

karam-hā-e-nā-mustaqil kā gila kyā

sitam-hā-e-be-intihā chāhtā huuñ

vo ghabrā ke jis par nazar Daal hī deñ

maiñ vo qalb-e-shorish-adā chāhtā huuñ

karam kījiye to karam kā huuñ tālib

sazā dījiye to sazā chāhtā huuñ

tirī yaad achchhī tarah zikr pyārā

magar maiñ tujhe dekhnā chāhtā huuñ

tire ishq hī se banī merī hastī

tire ishq hī meñ miTā chāhtā huuñ

jo taaza kare qissa-e-tūr 'bāsit'

maiñ aisā hī ik vāqi.a chāhtā huuñ

mohabbat ki intiha chahta hun

unhen hasil-e-ibtida chahta hun

use barmala dekhna chahta hun

adab ai mohabbat ye kya chahta hun

gham-e-ishq ka silsila chahta hun

main tujh tak tera wasta chahta hun

karam-ha-e-na-mustaqil ka gila kya

sitam-ha-e-be-intiha chahta hun

wo ghabra ke jis par nazar Dal hi den

main wo qalb-e-shorish-ada chahta hun

karam kijiye to karam ka hun talib

saza dijiye to saza chahta hun

teri yaad achchhi tarah zikr pyara

magar main tujhe dekhna chahta hun

tere ishq hi se bani meri hasti

tere ishq hi mein miTa chahta hun

jo taza kare qissa-e-tur 'basit'

main aisa hi ek waqia chahta hun