mohabbat ki mukammal taur par tashrih karta hai

mohabbat kī mukammal taur par tashrīh kartā hai

ye dil jab bhī dhaḌaktā hai tirī tasbīh kartā hai

use kyā dil-lagī kā naam denā bhī munāsib hai

hamāre saath vo jo muft meñ tafrīh kartā hai

basā-auqāt kuchh ġhalatī kī gunjā.ish nahīñ hotī

to phir vo ġhalatiyoñ kī kis liye tas.hīh kartā hai

hamārī āfiyat bhī hai usī kī maan lene meñ

tabhī to pesh rozāna koī tauzīh kartā hai

mujhe ye sher us kachche ghaḌe ke naam karne haiñ

kahānī meñ vahī paidā koī talmīh kartā hai

zarūrat paḌ bhī saktī hai kahīñ ramz-o-kinā.e kī

vo pāgal-pan meñ har ik baat kī tasrīh kartā hai

miyāñ 'mas.ūd' pahle din se hī ye sar kā saudā bhī

mirī shorīdgī ko avvalīñ tarjīh kartā hai

mohabbat ki mukammal taur par tashrih karta hai

ye dil jab bhi dhaDakta hai teri tasbih karta hai

use kya dil-lagi ka nam dena bhi munasib hai

hamare sath wo jo muft mein tafrih karta hai

basa-auqat kuchh ghalati ki gunjaish nahin hoti

to phir wo ghalatiyon ki kis liye tashih karta hai

hamari aafiyat bhi hai usi ki man lene mein

tabhi to pesh rozana koi tauzih karta hai

mujhe ye sher us kachche ghaDe ke nam karne hain

kahani mein wahi paida koi talmih karta hai

zarurat paD bhi sakti hai kahin ramz-o-kinae ki

wo pagal-pan mein har ek baat ki tasrih karta hai

miyan 'masud' pahle din se hi ye sar ka sauda bhi

meri shoridgi ko awwalin tarjih karta hai