mohabbat ko rulaya tha kisi ne

mohabbat ko rulāyā thā kisī ne

hameñ bhī āzmāyā thā kisī ne

zamāne meñ kisī se dil lagā kar

kisī kā dil dukhāyā thā kisī ne

ujāloñ ko taraste haiñ abhī tak

kabhī jugnū bujhāyā thā kisī ne

masarrat se judā kar paas mere

udāsī ko biThāyā thā kisī ne

bichhaḌne kā irāda ham na samjhe

bahānā tak banāyā thā kisī ne

use ham bhuul bhī jaa.eñ to kaise

hameñ dil meñ basāyā thā kisī ne

isī mā'sūmiyat par mar miTe ham

kiyā vā'da nibhāyā thā kisī ne

hathelī par hamārā naam likh ke

raqīboñ ko dikhāyā thā kisī ne

mohabbat ko rulaya tha kisi ne

hamein bhi aazmaya tha kisi ne

zamane mein kisi se dil laga kar

kisi ka dil dukhaya tha kisi ne

ujalon ko taraste hain abhi tak

kabhi jugnu bujhaya tha kisi ne

masarrat se juda kar pas mere

udasi ko biThaya tha kisi ne

bichhaDne ka irada hum na samjhe

bahana tak banaya tha kisi ne

use hum bhul bhi jaen to kaise

hamein dil mein basaya tha kisi ne

isi ma'sumiyat par mar miTe hum

kiya wa'da nibhaya tha kisi ne

hatheli par hamara nam likh ke

raqibon ko dikhaya tha kisi ne