mohabbat mein KHirad ki rahbari dekhi nahin jati

mohabbat meñ ḳhirad kī rahbarī dekhī nahīñ jaatī

ye tauhīn-e-mazāq-e-āshiqī dekhī nahīñ jaatī

har ik tasvīr kī jalva-garī dekhī nahīñ jaatī

vo sūrat dekh kar phir dūsrī dekhī nahīñ jaatī

bahār achchhī tarah gulshan meñ aa.ī bhī nahīñ lekin

asīroñ se nazar sayyād kī dekhī nahīñ jaatī

dil-e-muztar mirā parvarda-e-āġhosh-e-tūfāñ hai

ḳhushī ye mauj-e-sāhil par kabhī dekhī nahīñ jaatī

mirī hastī kā parda bhī mirī nazroñ se uTh jaa.e

ki vaqt-e-dīd-e-jānāñ ye duī dekhī nahīñ jaatī

ise piite haiñ āñkheñ band karke baada kash zāhid

nigāhoñ se ye shīshe kī parī dekhī nahīñ jaatī

nigāh-e-shauq kyā dekhegī jalva husn kāmil kā

jab adnā sī tajallī tuur kī dekhī nahīñ jaatī

nazar jitnī thī sarf-e-dīd-e-jānāñ ho ga.ī 'afqar'

koī shai ab jahān-e-husn kī dekhī nahīñ jaatī

mohabbat mein KHirad ki rahbari dekhi nahin jati

ye tauhin-e-mazaq-e-ashiqi dekhi nahin jati

har ek taswir ki jalwa-gari dekhi nahin jati

wo surat dekh kar phir dusri dekhi nahin jati

bahaar achchhi tarah gulshan mein aai bhi nahin lekin

asiron se nazar sayyaad ki dekhi nahin jati

dil-e-muztar mera parwarda-e-aghosh-e-tufan hai

KHushi ye mauj-e-sahil par kabhi dekhi nahin jati

meri hasti ka parda bhi meri nazron se uTh jae

ki waqt-e-did-e-jaanan ye dui dekhi nahin jati

ise pite hain aankhen band karke baada kash zahid

nigahon se ye shishe ki pari dekhi nahin jati

nigah-e-shauq kya dekhegi jalwa husn kaamil ka

jab adna si tajalli tur ki dekhi nahin jati

nazar jitni thi sarf-e-did-e-jaanan ho gai 'afqar'

koi shai ab jahan-e-husn ki dekhi nahin jati