mohabbat mein wafa walon ko kab iza satati hai

mohabbat meñ vafā vāloñ ko kab iizā satātī hai

ye vo haiñ jin ko suulī par bhī chaḌh kar niiñd aatī hai

junūn-e-ishq kī manzil se vāqif hī nahīñ koī

hamārī chāk-dāmānī pe duniyā muskurātī hai

masāfat rāh-e-ulfat kī nahīñ āsāñ dil-e-nādāñ

mohabbat har qadam par saiñkḌoñ fitne uThātī hai

ḳhudā ma.alūm kab parda uThegā diid kab hogī

nigāhoñ se jo ojhal hai usī kī yaad aatī hai

bahātā huuñ kabhī aañsū kabhī phirtā huuñ maiñ vāpas

mohabbat kī ḳhalish aisā shab-e-ġham meñ satātī hai

miTe par bhī vahī hai rahnumā.ī kā asar is meñ

musāfir ko hamārī ḳhaak bhī sattā batātī hai

zamāne ko adam ābād meñ ik roz aanā hai

suno shahr-e-ḳhamoshāñ se yahī āvāz aatī hai

uThā parda to ab dekhā nahīñ jaatā qayāmat hai

mirī nākāmiyoñ par vo tajallī muskurātī hai

mohabbat mein wafa walon ko kab iza satati hai

ye wo hain jin ko suli par bhi chaDh kar nind aati hai

junun-e-ishq ki manzil se waqif hi nahin koi

hamari chaak-damani pe duniya muskuraati hai

masafat rah-e-ulfat ki nahin aasan dil-e-nadan

mohabbat har qadam par sainkDon fitne uThati hai

KHuda malum kab parda uThega did kab hogi

nigahon se jo ojhal hai usi ki yaad aati hai

bahata hun kabhi aansu kabhi phirta hun main wapas

mohabbat ki KHalish aisa shab-e-gham mein satati hai

miTe par bhi wahi hai rahnumai ka asar is mein

musafir ko hamari KHak bhi satta batati hai

zamane ko adam aabaad mein ek roz aana hai

suno shahr-e-KHamoshan se yahi aawaz aati hai

uTha parda to ab dekha nahin jata qayamat hai

meri nakaamiyon par wo tajalli muskuraati hai