mohabbat mein wafaon ka yahi inam hai sufi

mohabbat meñ vafāoñ kā yahī in.aam hai 'sūfī'

liye dāġh-e-judā.ī hasrat-e-nākām hai 'sūfī'

agar ilzām hai koī to ye ilzām hai 'sūfī'

ki tū apnī sharāfat ke liye badnām hai 'sūfī'

hamīñ har daur meñ the gardish-e-ayyām ke maare

magar ham se ilāj-e-gardish-e-ayyām hai 'sūfī'

ba-faiz-e-rasm-e-mai-ḳhāna badalte hī rahe saaqī

jo bin māñge pilā.e sāqī-e-gulfām hai 'sūfī'

kashākash-hā-e-hastī ne jise dīvāngī baḳhshī

vo dīvāna harīf-e-talḳhī-e-ayyām hai 'sūfī'

tire gītoñ kī jhankāroñ se duniyā guuñj to uTThī

magar kāshī kī nagrī meñ baḌā gumnām hai 'sūfī'

mohabbat mein wafaon ka yahi inam hai 'sufi'

liye dagh-e-judai hasrat-e-nakaam hai 'sufi'

agar ilzam hai koi to ye ilzam hai 'sufi'

ki tu apni sharafat ke liye badnam hai 'sufi'

hamin har daur mein the gardish-e-ayyam ke mare

magar hum se ilaj-e-gardish-e-ayyam hai 'sufi'

ba-faiz-e-rasm-e-mai-KHana badalte hi rahe saqi

jo bin mange pilae saqi-e-gulfam hai 'sufi'

kashakash-ha-e-hasti ne jise diwangi baKHshi

wo diwana harif-e-talKHi-e-ayyam hai 'sufi'

tere giton ki jhankaron se duniya gunj to uTThi

magar kashi ki nagri mein baDa gumnam hai 'sufi'