mohabbat mein wo hum ko nashad kar ke

mohabbat meñ vo ham ko nāshād kar ke

pareshāñ pareshāñ haiñ bedād kar ke

vahī haañ vahī jo hameñ bhuul baiThe

bahut ro.e kal ham unheñ yaad kar ke

usī ke liye mere lab par duā hai

mujhe rakh diyā jis ne barbād kar ke

mohabbat meñ vo daur nazdīk hai phir

taḌap jāoge tum hameñ yaad kar ke

huī daulat-e-zabt barbād yuuñ hī

milā kyā shab-e-hijr fariyād kar ke

nahīñ aaj to kal rahūñgā yaqīnan

asīroñ ko zindāñ se āzād kar ke

huā ik zamāna taḌapte haiñ ab tak

kisī be-muravvat ko ham yaad kar ke

tujhe kyā milegā ye gulchīñ se pūchheñ

gulistāñ meñ phūloñ ko barbād kar ke

'vakīl' ahl-e-dil sab taḌapte raheñge

hamārī pareshāniyāñ yaad kar ke

mohabbat mein wo hum ko nashad kar ke

pareshan pareshan hain bedad kar ke

wahi han wahi jo hamein bhul baiThe

bahut roe kal hum unhen yaad kar ke

usi ke liye mere lab par dua hai

mujhe rakh diya jis ne barbaad kar ke

mohabbat mein wo daur nazdik hai phir

taDap jaoge tum hamein yaad kar ke

hui daulat-e-zabt barbaad yun hi

mila kya shab-e-hijr fariyaad kar ke

nahin aaj to kal rahunga yaqinan

asiron ko zindan se aazad kar ke

hua ek zamana taDapte hain ab tak

kisi be-murawwat ko hum yaad kar ke

tujhe kya milega ye gulchin se puchhen

gulistan mein phulon ko barbaad kar ke

'wakil' ahl-e-dil sab taDapte rahenge

hamari pareshaniyan yaad kar ke