mohabbat qata ki tumne wo koson uD gaya tum se

mohabbat qat.a kī tum ne vo kosoñ uḌ gayā tum se

dil apnā rishta-e-ulfat kā thā ai gul-ruḳhāñ bāñdhā

abhī jauhar karūñgā apnā varna sach batā mujh ko

tirī teġh-e-nigah ne mashvara kyā merī jaañ bāñdhā

ġharīq-e-bahr-e-hushyārī ko har-dam fikr-e-sāmāñ ho

kabhī yaañ kashtī-e-mai par na ham ne bādbāñ bāñdhā

adāvat nīm-jāñ majnūñ se kyā hai tujh ko ai zālim

muġhīlāñ meñ jo kHālī naaqa lā kar sāriyāñ bāñdhā

kiyā hijrāñ kī shab meñ koh-e-ġham ne mujh ko chuur aisā

ki jarrāhoñ ne sub.h aa kar mirā har ustuḳhvāñ bāñdhā

banā thā panja-e-jarrāh rashk-e-panja-e-marjāñ

tire zaḳhmī kā jis dam us ne zaḳhm-e-ḳhūñ-chakāñ bāñdhā

mirā har misra-e-dīvānñ hai ik shāḳh-e-shakar goyā

lab-e-shīrīñ kā mazmūñ maiñ ne ai shīrīñ-zabāñ bāñdhā

zamān-e-naza.a dekhā ik nazar hūr-e-bahishtī ko

ye bohtān apne āshiq par abas ai bad-gumāñ bāñdhā

koī ai hāmilān-e-arsh tum se daad letā huuñ

sutūn ik ab mire nāloñ ne sū-e-lā-makāñ bāñdhā

shahīd is qadrdānī kā huuñ TukḌe kar ke āshiq ko

lahad par naḳhl-e-mātam yaar ne bahr-e-nishāñ bāñdhā

mujhe ik umr se thā motiyoñ ke sehre kā armān

shab-e-furqat meñ tū ne dīda-e-gauhar-fishāñ bāñdhā

rasā.ī ek tere baam tak us ko nahīñ zālim

kamand-e-āh meñ sau baar maiñ ne āsmāñ bāñdhā

vo ganj-e-zāt kyā kuchh hogā yārab maiñ to hairāñ huuñ

hifāzat ke liye jis par tilism-e-do-jahāñ bāñdhā

'shahīdī' kasrat-e-isyāñ se mujh ko ḳhauf aatā hai

safar hai duur kā aur dosh par bār-e-garāñ bāñdhā

mohabbat qata ki tum ne wo koson uD gaya tum se

dil apna rishta-e-ulfat ka tha ai gul-ruKHan bandha

abhi jauhar karunga apna warna sach bata mujh ko

teri tegh-e-nigah ne mashwara kya meri jaan bandha

ghariq-e-bahr-e-hushyari ko har-dam fikr-e-saman ho

kabhi yan kashti-e-mai par na hum ne baadban bandha

adawat nim-jaan majnun se kya hai tujh ko ai zalim

mughilan mein jo kHali naqa la kar sariyan bandha

kiya hijran ki shab mein koh-e-gham ne mujh ko chur aisa

ki jarrahon ne subh aa kar mera har ustuKHwan bandha

bana tha panja-e-jarrah rashk-e-panja-e-marjaan

tere zaKHmi ka jis dam us ne zaKHm-e-KHun-chakan bandha

mera har misra-e-diwann hai ek shaKH-e-shakar goya

lab-e-shirin ka mazmun main ne ai shirin-zaban bandha

zaman-e-naza dekha ek nazar hur-e-bahishti ko

ye bohtan apne aashiq par abas ai bad-guman bandha

koi ai hamilan-e-arsh tum se dad leta hun

sutun ek ab mere nalon ne su-e-la-makan bandha

shahid is qadrdani ka hun TukDe kar ke aashiq ko

lahad par naKHl-e-matam yar ne bahr-e-nishan bandha

mujhe ek umr se tha motiyon ke sehre ka arman

shab-e-furqat mein tu ne dida-e-gauhar-fishan bandha

rasai ek tere baam tak us ko nahin zalim

kamand-e-ah mein sau bar main ne aasman bandha

wo ganj-e-zat kya kuchh hoga yarab main to hairan hun

hifazat ke liye jis par tilism-e-do-jahan bandha

'shahidi' kasrat-e-isyan se mujh ko KHauf aata hai

safar hai dur ka aur dosh par bar-e-garan bandha