mohabbat se junun ki dastan tak aa gaya hun main

mohabbat se junūñ kī dāstāñ tak aa gayā huuñ maiñ

kisī ke 'ishq meñ dekho kahāñ tak aa gayā huuñ maiñ

ye rāheñ ḳhud-baḳhud kaise munavvar ho uThīñ yā-rab

gumāñ hotā hai manzil ke nishāñ tak aa gayā huuñ maiñ

kise mā'lūm thā jazbāt ye bhī rang lā.eñge

junūñ meñ ab kisī ke imtihāñ tak aa gayā huuñ maiñ

kabhī ik dard ban kar sirf un ke dil meñ pinhāñ thā

magar ab giit ban kar har zabāñ tak aa gayā huuñ maiñ

nahīñ vo baat hī kuchh aur thī jis kī tamanna thī

yuuñ hī jazbāt kī rau meñ yahāñ tak aa gayā huuñ maiñ

tumhārī in hasīñ maḳhmūr āñkhoñ kī qasam hamdam

vahīñ tak rāh-e-ulfat hai jahāñ tak aa gayā huuñ maiñ

kahīñ manzil se aage hī na aa pohñchā huuñ maiñ yaaro

zarā āvāz do mujh ko kahāñ tak aa gayā huuñ maiñ

tamanna hai ufuq ke dhuñdle parde chaak kar Dālūñ

kisī kī justujū meñ ab yahāñ tak aa gayā huuñ maiñ

mohabbat se junun ki dastan tak aa gaya hun main

kisi ke 'ishq mein dekho kahan tak aa gaya hun main

ye rahen KHud-baKHud kaise munawwar ho uThin ya-rab

guman hota hai manzil ke nishan tak aa gaya hun main

kise ma'lum tha jazbaat ye bhi rang laenge

junun mein ab kisi ke imtihan tak aa gaya hun main

kabhi ek dard ban kar sirf un ke dil mein pinhan tha

magar ab git ban kar har zaban tak aa gaya hun main

nahin wo baat hi kuchh aur thi jis ki tamanna thi

yun hi jazbaat ki rau mein yahan tak aa gaya hun main

tumhaari in hasin maKHmur aankhon ki qasam hamdam

wahin tak rah-e-ulfat hai jahan tak aa gaya hun main

kahin manzil se aage hi na aa pohncha hun main yaro

zara aawaz do mujh ko kahan tak aa gaya hun main

tamanna hai ufuq ke dhundle parde chaak kar Dalun

kisi ki justuju mein ab yahan tak aa gaya hun main