mohabbat sehr hai yaro agar hasil ho yak-rui

mohabbat sehr hai yaaro agar hāsil ho yak-rūī

ye afsūñ ḳhuub asar kartā hai lekin jabki jādūī

ḳhayāl-e-mā-sivā siiñ saaf kar tū apne siine kuuñ

ki dil ke riahrta-e-iḳhlās kuuñ lāzim hai yaksūī

libās-e-pumbai bin kyūñke guzre mausam-e-sarmā

qayāmat hai ye terī sard-mehrī tis pe ye sardī

añdherā aa gayā āñkhoñ ke aage ḳhashm suuñ merī

jabhī us chhokare kī bul-havas neñ zulf Tuk chhūī

pasīne siiñ tire ai shoḳh bū aatī hai daarū kī

etī ai fitnagar sīkhī kahāñ siiñ tū neñ bad-ḳhūī

muqābil duḳhtar-e-raz kī jabhī vo muġhbacha bolā

ab us ke dekh maare shauq ke paanī ho karchūī

hue phirte ho dushman 'ābrū' ke ai sajan ab to

kaho ulfat dilī aur dostī jaanī vo kyā huī

mohabbat sehr hai yaro agar hasil ho yak-rui

ye afsun KHub asar karta hai lekin jabki jadui

KHayal-e-ma-siwa sin saf kar tu apne sine kun

ki dil ke riahrta-e-iKHlas kun lazim hai yaksui

libas-e-pumbai bin kyunke guzre mausam-e-sarma

qayamat hai ye teri sard-mehri tis pe ye sardi

andhera aa gaya aankhon ke aage KHashm sun meri

jabhi us chhokare ki bul-hawas nen zulf Tuk chhui

pasine sin tere ai shoKH bu aati hai daru ki

eti ai fitnagar sikhi kahan sin tu nen bad-KHui

muqabil duKHtar-e-raz ki jabhi wo mughbacha bola

ab us ke dekh mare shauq ke pani ho karchui

hue phirte ho dushman 'abru' ke ai sajan ab to

kaho ulfat dili aur dosti jaani wo kya hui