mohabbat tum se hai lekin juda hain

mohabbat tum se hai lekin judā haiñ

hasīñ ho tum to ham bhī pārsā haiñ

hameñ kyā is se vo kaun aur kyā haiñ

ye kyā kam hai hasīñ haiñ dilrubā haiñ

zamāne meñ kise fursat jo dekhe

suḳhanvar kaun shai haiñ aur kyā haiñ

miTāte rahte haiñ ham apnī hastī

ki āgāh-e-mizāj-e-dilrubā haiñ

na jaane darmiyāñ kaun aa gayā hai

na vo ham se na ham un se judā haiñ

kabhī ro ro ke sochegī ye duniyā

abhī ham kyā batā.eñ aah kyā haiñ

nahīñ bantī hai kuchh bhī kahte sunte

'ajab kuchh gū-magū meñ mubtalā haiñ

ye terī be-ruḳhī ye sargirānī

jiye jaate haiñ jo ham be-hayā haiñ

jigar bantā nahīñ kuchh karte dharte

ki bilkul jaise ham be-dast-o-pā haiñ

mohabbat tum se hai lekin juda hain

hasin ho tum to hum bhi parsa hain

hamein kya is se wo kaun aur kya hain

ye kya kam hai hasin hain dilruba hain

zamane mein kise fursat jo dekhe

suKHanwar kaun shai hain aur kya hain

miTate rahte hain hum apni hasti

ki aagah-e-mizaj-e-dilruba hain

na jaane darmiyan kaun aa gaya hai

na wo hum se na hum un se juda hain

kabhi ro ro ke sochegi ye duniya

abhi hum kya bataen aah kya hain

nahin banti hai kuchh bhi kahte sunte

'ajab kuchh gu-magu mein mubtala hain

ye teri be-ruKHi ye sargirani

jiye jate hain jo hum be-haya hain

jigar banta nahin kuchh karte dharte

ki bilkul jaise hum be-dast-o-pa hain