mohabbat umr bhar ki raegan karna nahin achchha

mohabbat umr bhar kī rā.egāñ karnā nahīñ achchhā

sambhal ai dil anā ko āsmāñ karnā nahīñ achchhā

kuchh aise raaz hote haiñ bayāñ karnā nahīñ achchhā

har ik chehre kī sachchā.ī ayaañ karnā nahīñ achchhā

kisī nākām hasrat kī jo sulge aag siine meñ

havā yādoñ kī mat denā dhyāñ karnā nahīñ achchhā

chaman meñ huuñ to phir maiñ bhī chaman kā ek hissa huuñ

taġhāful itnā mere bāġhbāñ karnā nahīñ achchhā

hifāzat se utāro ashk-e-ġham ko dil kī siipī meñ

kisī qatre ko bahr-e-be-karāñ karnā nahīñ achchhā

ujāle hī nahīñ hai tīrgī bhī ziist kā hāsil

ki in tārīkiyoñ ko be-zabāñ karnā nahīñ achchhā

mohabbat umr bhar ki raegan karna nahin achchha

sambhal ai dil ana ko aasman karna nahin achchha

kuchh aise raaz hote hain bayan karna nahin achchha

har ek chehre ki sachchai ayan karna nahin achchha

kisi nakaam hasrat ki jo sulge aag sine mein

hawa yaadon ki mat dena dhyan karna nahin achchha

chaman mein hun to phir main bhi chaman ka ek hissa hun

taghaful itna mere baghban karna nahin achchha

hifazat se utaro ashk-e-gham ko dil ki sipi mein

kisi qatre ko bahr-e-be-karan karna nahin achchha

ujale hi nahin hai tirgi bhi zist ka hasil

ki in tarikiyon ko be-zaban karna nahin achchha