mohabbaton ka azab maine ghamon ki surat chuka diya hai

mohabbatoñ kā 'azāb maiñ ne ġhamoñ kī sūrat chukā diyā hai

na chheḌ mujh ko ai mere dushman ki maiñ ne ḳhud ko miTā diyā hai

adā-e-dil meñ guloñ kī ḳhushbū mahak rahī hai 'azāb ban kar

ye dil kā saudā kiyā hai tū ne ki dil ko majnūñ banā diyā hai

taḌap ke maiñ ne jo terī yādoñ kā dil meñ apne gulāb rakkhā

na dil hī mahkā na ye chaman hī jo yaad thā sab bhulā diyā hai

ye hijr aur ye visāl donoñ tumhāre hone se munsalik the

ye parda-poshī jo darmiyāñ thī hijāb kis ne uThā diyā hai

kamāl ye thā ki jis kī ḳhātir zamāne vāloñ se laḌ paḌī maiñ

usī ne dāman ko chhed Daalā usī ne dil varġhalā diyā hai

tamām vā'de vafā kareñge ye tai huā thā so is liye bhī

vafā kī rah meñ maiñ jhuk ga.ī thī charāġh-e-dil ko bujhā diyā hai

qadam qadam par aziyyatoñ ke nishāñ mile the chahār-jānib

maiñ sū-e-maqtal chalī ga.ī thī ye kis ne qissa sunā diyā hai

maiñ rāh-e-haq se bhaTak ga.ī thī na koī manzil thī na nishāñ thā

dil-e-shikasta kī ḳhair jis ne charāġh shab kā jalā diyā hai

'umūd' soī rahī maiñ shab bhar 'ajīb halchal machī huī thī

ki qahr barpā huā thā shab ko ye ḳhvāb kis ne dikhā diyā hai

mohabbaton ka 'azab main ne ghamon ki surat chuka diya hai

na chheD mujh ko ai mere dushman ki main ne KHud ko miTa diya hai

ada-e-dil mein gulon ki KHushbu mahak rahi hai 'azab ban kar

ye dil ka sauda kiya hai tu ne ki dil ko majnun bana diya hai

taDap ke main ne jo teri yaadon ka dil mein apne gulab rakkha

na dil hi mahka na ye chaman hi jo yaad tha sab bhula diya hai

ye hijr aur ye visal donon tumhaare hone se munsalik the

ye parda-poshi jo darmiyan thi hijab kis ne uTha diya hai

kamal ye tha ki jis ki KHatir zamane walon se laD paDi main

usi ne daman ko chhed Dala usi ne dil warghala diya hai

tamam wa'de wafa karenge ye tai hua tha so is liye bhi

wafa ki rah mein main jhuk gai thi charagh-e-dil ko bujha diya hai

qadam qadam par aziyyaton ke nishan mile the chahaar-jaanib

main su-e-maqtal chali gai thi ye kis ne qissa suna diya hai

main rah-e-haq se bhaTak gai thi na koi manzil thi na nishan tha

dil-e-shikasta ki KHair jis ne charagh shab ka jala diya hai

'umud' soi rahi main shab bhar 'ajib halchal machi hui thi

ki qahr barpa hua tha shab ko ye KHwab kis ne dikha diya hai