mohabbaton ke ye dariya utar na jaen kahin

mohabbatoñ ke ye dariyā utar na jaa.eñ kahīñ

jo dil gulāb haiñ zaḳhmoñ se bhar na jaa.eñ kahīñ

abhī to vā'da-o-paimāñ hai aur ye haal apnā

visāl ho to ḳhushī se hī mar na jaa.eñ kahīñ

ye rang chehre ke aur ḳhvāb apnī āñkhoñ ke

havā chale koī aisī bikhar na jaa.eñ kahīñ

jhalak rahā hai jin āñkhoñ se ab vujūd mirā

ye āñkheñ haa.e ye āñkheñ mukar na jaa.eñ kahīñ

pukārtī hī na rah jaa.e ye zamīñ pyāsī

barasne vaale ye bādal guzar na jaa.eñ kahīñ

nidhāl ahl-e-tarab haiñ ki ahl-e-gulshan ke

bujhe bujhe se ye chehre sañvar na jaa.eñ kahīñ

fazā-e-shahr 'aqīdoñ kī dhund meñ hai asiir

nikal ke ghar se ab ahl-e-nazar na jaa.eñ kahīñ

mohabbaton ke ye dariya utar na jaen kahin

jo dil gulab hain zaKHmon se bhar na jaen kahin

abhi to wa'da-o-paiman hai aur ye haal apna

visal ho to KHushi se hi mar na jaen kahin

ye rang chehre ke aur KHwab apni aankhon ke

hawa chale koi aisi bikhar na jaen kahin

jhalak raha hai jin aankhon se ab wujud mera

ye aankhen hae ye aankhen mukar na jaen kahin

pukarti hi na rah jae ye zamin pyasi

barasne wale ye baadal guzar na jaen kahin

nidhaal ahl-e-tarab hain ki ahl-e-gulshan ke

bujhe bujhe se ye chehre sanwar na jaen kahin

faza-e-shahr 'aqidon ki dhund mein hai asir

nikal ke ghar se ab ahl-e-nazar na jaen kahin