mohabbaton ki inayaton se hua hai dil ye KHarab baba

mohabbatoñ kī ināyatoñ se huā hai dil ye ḳharāb baabā

ḳhudā-parastī kā taur dekho banā hai kaisā azaab baabā

jhulas rahā hai zamīñ kā siina kiran kiran se duā karo tum

trāvatoñ kī do buuñd le kar yahāñ bhī barse sahāb baabā

hai fāqa-mastī kā silsila jab to aa.e saḳhtī qadam meñ kaise

ye nā-tavānī kī larzisheñ haiñ na pī hai maiñ ne sharāb baabā

fazā kī jab mo'atabar matānat gurez-pā ho ke rah ga.ī hai

kahāñ likhegā vo ḳhāmushī se savāl paḌh kar javāb baabā

hazār taftīsh par mujhe ab pata chalā hai ki mere dil ko

bahut hī bechain kar gayā thā sahar se shab kā hijāb baabā

tarah tarah se tabassumoñ meñ lapeT kar ḳhvāhishoñ ne luuTā

kise chhupā.ūñ kahāñ se bolūñ batāo mujh ko vo ḳhvāb baabā

muravvatoñ kī masarratoñ kī kahāniyāñ darj kī ga.ī thiiñ

jagah jagah se phaTī paḌī hai na kholo ab vo kitāb baabā

sa.ūbatoñ kī afādiyat se koī bhī munkir na ho sakegā

ki ḳhaar ke darmiyān rah kar mahak rahā hai gulāb baabā

vo sāTh-bāsaTh kī sīḌhiyoñ par thakāvatoñ se hai chuur phir bhī

sameT kar hausloñ ko 'ja.afar' talāshtā hai shabāb baabā

mohabbaton ki inayaton se hua hai dil ye KHarab baba

KHuda-parasti ka taur dekho bana hai kaisa azab baba

jhulas raha hai zamin ka sina kiran kiran se dua karo tum

trawaton ki do bund le kar yahan bhi barse sahab baba

hai faqa-masti ka silsila jab to aae saKHti qadam mein kaise

ye na-tawani ki larzishen hain na pi hai main ne sharab baba

faza ki jab mo'atabar matanat gurez-pa ho ke rah gai hai

kahan likhega wo KHamushi se sawal paDh kar jawab baba

hazar taftish par mujhe ab pata chala hai ki mere dil ko

bahut hi bechain kar gaya tha sahar se shab ka hijab baba

tarah tarah se tabassumon mein lapeT kar KHwahishon ne luTa

kise chhupaun kahan se bolun batao mujh ko wo KHwab baba

murawwaton ki masarraton ki kahaniyan darj ki gai thin

jagah jagah se phaTi paDi hai na kholo ab wo kitab baba

saubaton ki afadiyat se koi bhi munkir na ho sakega

ki KHar ke darmiyan rah kar mahak raha hai gulab baba

wo saTh-basaTh ki siDhiyon par thakawaton se hai chur phir bhi

sameT kar hauslon ko 'jafar' talashta hai shabab baba